Ауыл шырайын кіргізген шаңырақ

Ауылдастары Сайын Боранқұлов пен Бәтима Маясарованың отбасын ынтымағына ырысы, бірлігіне берекесі сай шаңырақ ретінде құрметтейді, қадір тұтады. Отағасы еңбек жолын 1966 жылы тракторшы-механизаторлықтан бастады. Кейін етінің тірілігі, еңбекқорлығы мен өмірлік ұстанымы арқасында кеңшар комсомол комитетінің хатшысы, зоотехник, ферма меңгерушісі, шаруашылық директорының орынбасары, экономист болды. Қай қызметте болмасын іскерлік қабілетімен, ыждағаттылығымен танылған ол 2002 жылдан бастап «Темірлан» шаруа қожалығын ашып, басқарып келеді. Жолдасы Бәтима болса, 2009 жыл­ға дейін кітапхана меңгерушісі қыз­метін атқарып, зейнеткерлікке шық­ты. Қазір «Әли» дүкенін ашып, халыққа сауда қызметін көр­сетіп отыр. 5 бала, 11 немере тәр­би­е­леп отырған отбасы елге сыйлы, халқына қадірлі. Сайын Боранқұлұлы мен Батима Дүйсенбайқызының отбасын құрғанына 45 жыл болған екен. Жүрек қалауымен қосылып, ізгі тілектерімен ілгеріге қадам басқан ерлі-зайыптылар шаңырақтың шырайын келтіріп, келешегін кемел етуге жұдырықтай жұмылды, жарасты отбасы болудың үлкен мектебінен өтті. Олар – жоғары бі­лімді мамандар, ауылдың көр­кеюі­не бір кісідей үлес қосқан жан­дар. Бұл отбасын өздері туып-өс­кен Алты­қарасу округіндегі Еңбек­ші ауы­лының нағыз патри­от­тары деу орынды. Егін өсі­ру­­мен, мал шаруашылығымен айна­лыс­қан олар өнегелі отбасын қалып­­тас­­тыра отырып, ата кәсіптің ажа­­рын кел­тірді, еңбектің көрігін қыз­дыр­ды. Ерте тұрды, кеш жатты, ерін­беді, ертеңгі күнгі ажарлы тірлік­тің адал еңбекпен, маңдай термен келетінін өздері де түсінді, өз өне­ге­лері арқылы оған балаларын да тәр­бие­леді. Бұл отбасының шаруа­шылық­тардың ажары тайып, ел жаппай жан-жаққа көшіп жатқан күрделі жылдары Еңбекші елді мекенінің ыдырамай сақталып қалуына, он бір жылдық мектептің жабылмауына мұрындық болғанының өзі неге тұрады. Осындай игі істердің нәтжесінде ауылдың тұтас­тық тұғыры бекіп, әлеумет­тік нысандардың ұстағанның қо­лын­да, тістегеннің аузында кетпей сақталып қалғанын халық біледі. Осындағы мәдениет үйін, кітапхана, балабақшаны қайта қалпына келтіріп, білім беру ме­ке­мелерінің күрделі жөндеуіне қаржылай қолдау көрсетуден де еш­қашан тартынған емес. Ауылдағы жоқ-жітік, тұрмысы ауыр отбасыларын да өз қамқорлығына алып келеді. Осы Еңбекшіде қазір 101 отбасы тұрады. Сайын Боран­құлов солардың басым көпшілі­гіне жұмыс тауып беріп, мал, құс өсі­руге көмегін тигізіп отыр. Қа­­зір елдің тұрмысы түзелді, жағ­дайы жақсарды. Бүгінгі таңда ол шаруа қожа­лығында 205 ірі қара, 810 қой, 35 жылқы өсіріп отыр. Мал басын өз төлінен өсіруде жыл са­йын табысқа жетіп келеді. Қазіргі таңдағы жаңашыл әдістерді қол­дана отырып, асыл тұқымды мал басын көбейтуде. «Сыбаға» ауыл шаруа­шылығын қолдау қоры ар­қы­лы берілетін несиені пайда­ланып, шаруашылығын кеңей­туде. Еңбегінің нәтижесінде бірне­ше рет аудандық, облыстық, респуб­ликалық деңгейлердегі марапат­тарға ие болды. «Балапан ұяда не көрсе, ұш­қан­^­да соны іледі» дегендей, бала­­ларының барлығы жоғары бі­лім­ді, ата-ана жолын қуған, кәсіп­кер­лік­терін жалғастыруда. Немерелері – оқу озаттары, спорт, өнер, білім сайыс­тарының жеңімпаздары. Сайын Боран­құлов пен Бәтима Маясаро­ваның отбасы өмірлік құн­ды­лық­тар­ды жаңғырту және отба­сы өне­ге­сін насихаттау мақ­са­­тын­да өткізіліп келе жат­қан «Ме­рей­лі отбасы» ұлттық бай­қауы­ның облыстық кезеңіне қаты­сып, екінші орынды жеңіп алды. Мұ­ның өзі өнегелі отбасына берілген лайықты баға болды. Оған бұл шаңырақтағы бақуатты тұрмыс пен бақытты тірлік негіз қалап отырғаны сөзсіз. Сатыбалды СӘУІРБАЙ, «Егемен Қазақстан». Ақтөбе облысы, Темір ауданы.