Қызылордада жыл басынан бері 2,7 млрд. теңгенің жобасы жасалды

ҚЫЗЫЛОРДА. 3 тамыз. Қызылордада кәсіпкерлікке қолдау көрсету орталықтарының кеңесшілері кәсіпкерлерге жыл басынан бері жалпы құны 2,7 миллиард теңгені құрайтын 126 бизнес жоба әзірлеп берді. Оның жалпы құны 104 миллион теңге болатын 10 жобасы қаржыландырылды. Бұл туралы egemen.kz тілшісі хабарлады. Кәсіпкерлер палатасының кеңесшілеріне бизнес жоба әзірлеткендердің бірі Бауыржан Таңатар. Ол қызы Айдана Болатбекова екеуі бірінші «Бизнес-кеңесші», одан кейін «Бизнес өсу» жобасы бойынша оқып шықты. Оқыту курсына әкелі-қызды кәсіпкерлер дайын идеямен келді: мақсаттары жолаушылар тасымалын ұйымдастыруға бағытталған кәсіп ашу. «Бизнес-Өсу» жобасында Бауыржан кәсібін жан-жақты зерттеп, пайда табуға болатынына көз жеткізді. Ол бүгінде бизнесін ашудың бірінші кезеңінен сәтті өтті, яғни жолаушылар тасымалы үшін қажетті құжаттарын әзірлеп, тәжірибелі жүргізушілер алды. Ал Кәсіпкерлер палатасы бизнес жобасын әзірлеп берді. Қазір кәсіпкердің жобасы қаржыландыру үшін банкте қаралуда. Айта кету керек, өңірде жыл басынан бері Кәсіпкерлікті қолдау орталықтарының қызметін қолдана отырып 94 азамат кәсіпкерлік субъектісі ретінде тіркеуден өтіп, өз кәсібін ашқан. Ержан Байтілес. Дерек: egemen.kz. Сурет: old.palata.kz.