Жапонияда сезімтал робот сатылымға шықты

АСТАНА. 21 маусым. Жапонияның «Softbank» телекоммуникациялық компаниясы эмоцияларды айырып тани алатын «Pepper» роботын сатылымға шығарып, сезімтал техниканың 1 мың данасы бір сағат ішінде сатылып кетті. Бұл туралы «ҚазАқпарат» хабарлады. Әрбір роботтың құны 213 мың 840 иенді (шамамен 1.8 мың доллар) құрайды. Сезімтал робот сөйлеп, әңгімелесе алады. Адамның қас-қабағына қарап, оның көңіл күйін сезе біледі. Сондай-ақ, «Pepper» ең қарапайым тапсырмаларды орындап, үй шаруасына көмектеседі. Ең бастысы ол жалғызбасты адамдарға көмекші бола алады. Айта кетейік, роботты «Softbank» пен «Aldebaran Robotics SAS» бірге жасап шығарды. Мамандар қазірдің өзінде инновациялық ойыншықтан жылына 8 млрд. доллар табуды жоспарлап отыр. Талғат Райымбек. Дерек: «ҚазАқпарат». Сурет: glob-news.com.