ҚЫЗЫЛОРДА. 6 мамыр. Ұлы Жеңістің 70 жылдығы мерекесі қарсаңында Қызылорда облысының кәсіпкерлер палатасы «Ерлікке тағзым» әлеуметтік жобасы аясында ардагерлерге ерекше мерекелік тарту жасады. Бұл туралы egemen.kz тілшісі хабарлады.
Атап айтқанда, Қызылорда қаласындағы 41 ардагерге арнайы тапсырыспен өздерінің суреттері бейнеленген портреттер жасалып, сыйға берілді.
Мұндай құрметке ризашылықтарын білдірген ардагерлер, бейбіт өмірдің қадірін білуге шақырды.
Бүгінде Қызылордада 90-ға жуық көзі тірі Ұлы Отан соғысының ардагері бар. Жеңіс күні қарсаңында қызылордалық кәсіпкерлер ардагерлерге құрмет көрсетуде.
Осы уақытқа дейін қала кәсіпкерлері 12 ардагерге барлығы 1 миллион теңгеден астам қаржылай көмек көрсетіп, 10-ға жуық ардагерге тұрмыстық техника, үй-жиһаздарын алып берді.
Айта кету керек, «Атамекен» Ұлттық кәсіпкерлер палатасы бүгінде «Ерлікке тағзым» әлеуметтік жобасын жүзеге асыруда. Жобаның басты мақсаты – еліміздегі ардагерлерге әлеуметтік және материалдық тұрғыдан көмек көрсету. Шара республика көлемінде өткізілмек.
Ержан Байтілес.
Дерек, сурет: egemen.kz.
