Қазақстан – өңірдегі адам құқықтарын ілгерілетудің үлгісі

Астанада Қазақстан Республикасындағы Адам құқықтары жөніндегі уәкілі А. Шәкіровтің БҰҰ Адам құқықтары жөніндегі Жоғарғы комиссар басқармасының Орталық Азия бойынша аумақтық өкілінің міндетін атқарушы Элизабет да Коштамен кездесуі өтті. Кездесудің мақсаты Адам құ­қық­тары жөніндегі уәкіл мекемесі мен  БҰҰ Адам құқықтары жө­нін­дегі Жоғарғы комиссар басқар­масының арасындағы екіжақты ынтымақтастықты талқылау болды. А. Шәкіров әріптесіне 2015 жылдың наурыз айында Женевада болған сапарының қорытындылары жөнінде, сол жерде халықаралық ұйымдардың, сондай-ақ, Адам құқықтары жөніндегі Жоғарғы комиссар басқармасының басшыларымен болған кездесулері туралы ақпарат берді. Осы кездесулердің барысын­да біздің еліміздегі адам құқықтары қамтамасыз етілуіне оң баға берілді. Жоғарыда аталған ұйымдардың пікірінше, Қазақстан көршілес ел­дердің құқық қорғаушы әріп­тес­тері үшін адам құқықтарын тұрақты жылжыту мен халықаралық стандарттарды енгізу жөнінде тиімді тәжірибенің көзі болып табылады. Қазақстан уәкілінің сөзіне қара­ғанда, ел басшылығы тарапынан ұлт­тық құқық қорғау институты қыз­метінің барлық кезеңі бойынша сөзсіз қолдауы табысты қызметтің басты кепілі болып отыр. – Құқық қорғау қызметінің көп­теген саласындағы жинақталған тәжірибе өңірдегі елдер үшін едәуір  қызығушылық тудыруы мүмкін, – деп мәлімдеді А. Шәкіров. БҰҰ-ның Өңірлік өкілі Әмбебап кезеңдік шолудың екінші кезеңі барысында БҰҰ Адам құқықтары жөніндегі кеңесі, сондай-ақ, БҰҰ-ның Азаптауларға қарсы ко­ми­теті берген ұсыныстарды жү­зе­ге асыру бойынша қабылданып жатқан шаралармен танысты. Өз кезегінде Э. да Кошта қазақ­стандық уәкілдің қызметіне, оның елдегі ахуалды түсіну үшін ұсынатын ақпараттың маңыздылығына назар аударып, өзінің оң бағасын берді. БҰҰ Жоғарғы комиссарының өкілі  екіжақты ынтымақтастықты жалғастырудың орындылығымен келісті. Бұдан басқа, азаматтардың ко­н­с­титуциялық, оның ішінде, әлеу­меттік, экономикалық, еңбек, тұрғын үй, сондай-ақ, халықтың осал топтарының құқықтарын тиім­ді жүзеге асыру саласындағы уәкіл қыз­метінің мәселелері жөнінде ұтым­­ды әңгімелесу өтті. Қарастырылған тақырыптар бо­йынша бірқатар іс-шараларды (дөң­гелек үстелдер, семинарлар мен тренингтер) бірлесе ұйымдастыру туралы шешім қабылданды, деп хабарлады Қазақстан Республикасындағы Адам құқықтары жөніндегі уәкіл аппаратының баспасөз қызметі.