Петропавл тұрғындары тұрғын үй ақысын төлеуден бас тартты

ПЕТРОПАВЛ. 19 наурыз. Облыс орталығындағы «Юбилейный» көшесінде орналасқан көп қабатты 9 «б» ұйінің тұрғындары саналы түрде бас тартты. Бұл туралы egemen тілшісі хабарлады. 90  отбасы тұратын 10 қабатты үй 2012 жылы  пайдалануға берілген. Содан  бері  айғай-шудан көз ашпай келеді.  Басты себеп–сапасыз тұрғызылғаны. Тұрғындар көшіп келе бестағаннан-ақ баспананың кем-кетіктерін байқап, дабыл қаққан.  Алайда,  қалалық әкімдіктегілер  құрылыс жұмыстарына  бас мердігер жауап беретінін көлденең тартып, өздеріне шаң жуытпаған. Оның ақыры тұрғындардың  пәтерлердің жалға алу және коммуналдық қызмет ақыларын төлеуден бас тартуға соқтырған. Мердігерлердің айтуынша, жарты миллиард теңгеге жоспарланған көп қабатты үйдің 100  миллион теңгеге жуығы есепшотқа  түспегендіктен,  сапасыз материалдармен құрастыруға мәжбүр болған. «Ғимараттың қабырғалары үгітіліп түсе бастаған соң  құқық қорғау  органдарына арыздануға тура келді.  Сосын қарағандылық  сарапшы мамандар шақыртылып,  олар  үйдің  іргетасы мен қабырғаларындағы, дәліздердегі жарық-тесіктерді қалпына келтіру жөнінде шешім шығарған. Бүгінге дейін ескертулердің бірі де орындалған жоқ. Жанымызды шүберекке түйіп отырмыз.  Шенеуніктерден еш қайран жоқ. 2-3  айдан бері коммуналдық ақыларды төлемей отырмыз»,–дейді тұрғындар. Шығарыпсалма  уәдеден ауыздары әбден  күйген жұртшылық  қалалық тұрғын үй қызметі мекемесінің басшысы Виталий Беспаловтың «бұл үйге қатысты атқарылатын жұмыстардың көлемі белгіленген, қаржы да қарастырылған. Жаз келісімен ғимараттың шатырынан бастап жертөлесіне дейін жөндейміз. Жылу, су, кәріз жүйелерін де тексереміз», деген  уәжіне сенгілері жоқ. Тұрғындардың сөздеріне қарағанда қала әкімінің келуін күтіп отырған сыңайлары бар. Оның нақты уәдесін алмайынша  коммуналдық қызмет пен жалдамалы тұрғын үйлердің ақысын төлемейміз деген тас-түйін пікірден айнитын түрлері байқалмайды. Өмір Есқали.  Дерек: egemen.kz Сурет: egemen.kz