Павлодар облысы шағын және орта бизнесінің кәсіпорындары ЭКСПО-2017 жобасына барынша кеңінен қатысуды көздеп отыр. Олар құрылыс жұмыстарына ғана емес, сонымен бірге, логистикаға, қауіпсіздік пен қоғамдық тамақтандыру жүйесін ұйымдастыруға кеңінен тартылмақ. Осындай ұсыныстар Павлодар облысының кәсіпорындарымен таяуда өткен жұмыс барысындағы кездесудің күн тәртібіне қойылды.
«Астана ЭКСПО-2017» ҰК бас мердігерлерімен кездесуге осы аймақтың 30 өкілі келді. Кездесудің мақсаты – павлодарлық кәсіпорындарды, өңірдің шағын және орта бизнесін ЭКСПО-2017 жобасына белсенді түрде тарта отырып, көрмедегі жергілікті мазмұнның көлемін ұлғайту.
«Келісімшарт алдындағы мәмілелерге бұдан бұрын Павлодарда өткен кездесуде қол қойылған болатын. Бүгінгі кездесу – біздің бірлескен жұмысымыздың жалғасы. 2014 жылы біз материалдың алғашқы партиясын жеткіздік. Павлодардың металлургиялық кәсіпорындары арматураны 40 мың тоннаға дейінгі көлемде жеткізуге дайын, бұл шетелден әкелінетін шикізаттың орнын толығымен алмастыратын болады», – деп атап өтті кездесу кезінде Павлодар облысы әкімінің орынбасары Николай Дычко. «Астана ЭКСПО-2017» ҰК және Павлодар облысы әкімдігі арасында ынтымақтастық туралы меморандумға 2014 жылдың желтоқсанында қол қойылған болатын. Биылғы жылдың 1 шілдесіндегі жағдай бойынша қазірдің өзінде Павлодар облысынан құрылысқа 3 отандық тауар өндіруші тартылып, жасалған келісімшарттардың жалпы сомасы 760 млн. теңгені құрап отыр. Кездесуге металлургия, машина жасау, химия, жиһаз және жеңіл өнеркәсіп секілді түрлі салалардағы кәсіпорындар қатысты. Олардың арасында болат құю зауытына өкілдік ететін «Кастинг» ЖШС, сым-өткізгіш өнімдерді өндіретін «ҚазЭнергоКабель» АҚ және автокөлік жолдары мен әуежай жабындары құрылысында қолданылатын пенополистиролды өндіретін «СТИРОЛ компаниясы» ЖШС болды. «Біз өткен жылдан бастап материалды жеткізумен айналысып келеміз, келісімшарттардың сомасы әзірше үлкен емес, алайда «темірбетон кезеңі», кейін әрлеу кезеңі және сым-тетіктерді жүргізу кезеңі болатынын түсінеміз. Сондықтан біз екінші кезеңде жеткізілім сомасы өседі деп үміттеніп отырмыз. Қазір біз «BI Group» және «Базис-А» компанияларымен жұмыс жасап жатырмыз, ал «Mabetex» компаниясымен келіссөздер жүргізудеміз», – деді «ҚазЭнергоКабель» АҚ бас директоры Олег Крук. Сондай-ақ, кездесуге «Астана ЭСКПО-2017» ҰК-пен тығыз ынтымақтаса жұмыс жасайтын «Атамекен» ұлттық кәсіпкерлер палатасының өкілдері де қатысты. Қазіргі таңда отандық тауар өндірушілердің тізімі қалыптастырылып жатқаны атап өтілді. Бұл тізімнің ішіне металлургия, машина жасау, кабельдік өнімдер саласындағы компаниялар ғана емес, сонымен бірге қызмет көрсету саласындағы, әрлеу жұмыстарымен айналысатын кәсіпорындар да кіргізіліп отыр. Тізім «Астана ЭКСПО-2017» бас мердігерлерімен арадағы қатынас-байланысты жақсы қамтамасыз ету үшін қазақстандық тауар өндірушілерді бірыңғай тізімге жүйелеуге мүмкіндік бермек. Кездесу кезінде «Астана ЭСКПО-2017» ҰК басқарма төрағасының орынбасары Алмаз Жаманбеков бас мердігерлер мен отандық тауар өндірушілерді диалогқа шақырып, ЭКСПО-2017 жобасына қатысудың түрлі шарттары ұсынылғанын еске салды. «Қазір көрменің ресми қатысушыларына ұсынылатын тұрғын үй құрылысы жүргізілуде. Шағын және орта бизнес те сонда дамуы тиіс. Тек құрылыстың шеңберінде тұйықталып қалмаңыздар, өздеріңіздің компанияларыңызды түрлі салалардағы жұмыстарға тартыңыздар. Павлодарда шағын және орта бизнес жақсы дамыған. Сондықтан бұл мүмкіндікті логистикадан бастап, көлік, тамақтандыру жүйесі, құқық қорғау қызметін ұйымдастыруға дейінгі жұмыстарға тарту қажет», – деп атап өтті Алмаз Жаманбеков тауар өндірушілерге арнап айтқан сөзінде. Мұндай кездесулер алдағы уақытта Қазақстанның барлық облысының өкілдерімен өткізіледі. Қазіргі таңда «Астана ЭКСПО-2017» көрме нысандарының құрылысына 101 қазақстандық кәсіпорын тартылып, жасалған келісімшарттардың жалпы сомасы 88 млрд. теңгені құрағанын еске саламыз. Қазірдің өзінде Қарағанды, Қызылорда, Солтүстік Қазақстан, Павлодар, Шығыс Қазақстан, Жамбыл облыстарының әкімдіктерімен және Астана қаласының әкімдігімен тиісті меморандумдарға қол қойылған.
«Егемен-ақпарат».
