Петропавлда жергілікті тауар өндірушілерге қолдау көрсетілді

ПЕТРОПАВЛ. 17 ақпан. Петропавлда ірі дүкен иелері қазақстандық тауарларды саудалауға белсене кірісті. Бұл туралы egemen.kz тілшісі хабарлады. Үкіметтің кеңейтілген отырысында Мемлекет басшысы отандық өнім өндірушілерді қолдау туралы тапсырмасына айрықша қолдау көрсетіліп, супермаркет, гипермаркет сөрелеріне жергілікті азық-түлік өнімдері көптеп қойыла бастады. Бағалары қолжетімді. Тұтынушылар риза. Ұсынылған өнімдер арасында аймақта шығарылатын сұйық май, жұмыртқа, сүт, шұжық, тағы басқалары бар. «Қазақстанда шығарылған» деген атпен арнайы сөрелер жасақталып, макарон мен нан-тоқаш өнімдерінің ондаған түрлері қойылған. Бұл бастамаға өзге де сауда орындарының иелері қызу үн қосып, тауар бағасына 5-10 пайыз ғана үстеме қосуды ниет етіп отыр. Олардың айтуынша, отандық кәсіпкерлермен жұмыс істеу өте ыңғайлы. Себебі тауардың сапасы күмән тудырмайды. Жергілікті тауар өндірушілерді қолдаудың тағы бір тәсілі ретінде ірі сауда орталықтарында тамақтың дәмін тату шаралары да ұйымдастырыла бастады. Тамақ әзірлейтін кәсіпорындар дүкендерге келіп, өздерінің жаңа өнімдерін таныстырады. Адамдар оның дәмін татып, сол жерде пікір білдіруге мүмкіндік алады. Осындай жүйелі жүргізілген жұмыстардың арқасында тұтынушылардың отандық тауар өндірушілерге деген сенімі нығайып келеді, дейді супермаркет жүйесінің коммерциялық директоры Елена Матвиенко. Өмір Есқали. Дерек: egemen.kz. Сурет: «Астана» телеарнасы.