Кеше көрнекті опера әншісі, «Астана Опера» театры опера труппасын басқарған тұлға, режиссерлік бөлімнің қызметкері, Қазақстанның еңбек сіңірген қайраткері Байғали Момбеков 69 жасқа қараған шағында дүние салды.
1956 жылы Түркістан облысы Сарыағаш ауданында туған өнерпаз Құрманғазы атындағы Алматы мемлекеттік консерваториясының әншілік факультетін 1986 жылы бітірген, опералық және камералық әнші, педагог. 1999 жылдан Абай атындағы мемлекеттік академиялық опера және балет театрының солисі, кейін К.Байсейітова атындағы Ұлттық опера және балет театрының солисі ретінде қазақ өнеріне қызмет еткен тенор әнші тыңдарманның жүрегін ізгілікке, назға, әсемдікке бөледі. Өзі «әрбір романс терең сезімге толы ақпарат береді. Бұл музыка тыңдарманды мейірімділікке, қарым-қатынастағы тазалыққа тәрбиелеп, адамды лирикалық үйлесімділікке бағыттайды. Біздің концертімізге келген көрерменде міндетті түрде позитивті сезім пайда болады, олар жақсы көңіл күйден қуат алады» дегеніндей, көңіл тебіренте шырқаған романстары ел жүрегінен өшпек емес.
