ӨСКЕМЕН. 17 ақпан. «Нұр Отан» партиясы Тарбағатай аудандық филиалы жанындағы «Жас Отан» жастар қанатының ұйымдастыруымен Ұлы Жеңістің 70 жылдығына орай «Ардагерлерді ардақтайық» жобасы шеңберінде «Қолғабыс» акциясы өтті. Бұл туралы egemen.kz тілшісі хабарлады.
Тарбағатайлық жастар Сәтпаев ауылдық округінің Көктүбек елді мекенінде тұратын жалғызілікті қарт Қажкен Сейітовтің үйінің алды мен ауласының маңайындағы қарын күреп, отын-суын тасып, қоражайының төбесін бүтіндеп берді. Ал қыздар қарияның үйінің жинап, еденін жуып көмек көрсетті. Сондай-ақ С.Боранбаева, Ж.Қайырбекова сынды әкімшілік қызметкерлері де жастардың акциясына қатысып, өздері даярлаған сыйлықтарын ардагерге табыс етті.
Акцияға Көктүбек орта мектебінің «Қолқанат» атты оқушылар тобы мен ауыл жастары қатысты. Ауыл қарттары жастарға ризашылықтарын білдіріп, ақ баталарын берді.
Бұл игі бастама аудан көлемінде жалғасын тапты. Яғни тарбағатайлық жастар аудандағы 17 ауылдық округ пен 65 елді-мекенде тұратын барлық қарт адамдарға жәрдем көрсетуде.
«Жалпы, аудан жастары осындай игі бастамаларды қолға алып, қарттарға сый-құрмет көрсетуді дәстүрге айналдырып келеді. Соғыс ардагерлеріне, жалғыз басты аналарға, тыл және еңбек ардагерлеріне үнемі көмек көрсетіп, қол ұшын беріп отырамыз. Осындай сауапты да игі шара көпке үлгі екені сөзсіз», – деді партияның аудандағы филиалының «Жас Отан» жастар қанатының атқарушы хатшысы Дархан Кәрібаев.
Думан Анаш.
Дерек: еgemen.kz.
Сурет: «Нұр Отан» партиясы ШҚО филиалы.
