Өскеменде 209 нысан заңдастырылды

ӨСКЕМЕН. 17 ақпан. Өскеменде мүлікті заңдастыру барысының мәліметтері белгілі болды. Бұл туралы egemen.kz тілшісі хабарлады. 2015 жылдың 13 ақпанында тіркелген соңғы мәлімет бойынша, Өскемен қаласының мүлікті заңдастыру комиссиясының хатшылығы жалпы көлемі 1 922 867,0 мың теңге болатын мүлікті заңдастыру бойынша 274 өтінішті қабылдады. Оның ішінде тұрғынжай бойынша – 89, тұрғынжай емес – 185 (оның 38-і коммерциялық) нысан бар. Комиссия осыған дейін жалпы сомасы 582 890 мың теңге болатын 40 нысанды заңдастырудан бас тартса, жалпы сомасы 951 482 мың теңгелік 209 нысанды заңдастыру туралы өтінімді қанағаттандырды. Ал сомасы 388 495 мың теңгелік 25 нысанды заңдастыру жөніндегі шешімді қабылдау уақыты әлі келмеген. Іс жүзінде заңдастырылған 209 нысанның ішінде 72 үй, 58 көлікжай, 65 бау-бақшалық үй, 12 өндірістік нысан бар. Заңдастырудан бас тартқан нысандар қатарында сотта талас туып жатқан бір нысан, Ертіс және Үлбі өзендерінің судан қорғау белдеуінде тұрған 12 нысан және Үкімет қаулысымен бекітілген («Ақшадан басқа») Мүлікті заңдастыруды жүргізуді ұйымдастыру ережесінің» 13 бабында қарастырылған талаптарға сай емес 27 нысан барлығы белгілі болды. Айта кеткен абзал, Өскемен қаласы бойынша мүлікті заңдастыру комиссиясының мекенжайы: Өскемен қаласы, Протозанов көшесі, 37А үй, 2 қабат, 10 кабинет. Телефоны – 8(7232)260-090. Комиссияның отырысы әр аптаның жұма күні сағат 10.00-де басталады. Думан Анаш. Дерек: egemen.kz. Сурет: kapital.kz.