«Нұр Отан» партиясы облыстық филиалы ғимаратында Елбасының «100 нақты қадам» Ұлт жоспарын жүзеге асыруға бағытталған Парламент Сенатының депутаты, Сот жүйесі және құқық қорғау органдарының конституциялық заңнамасы жөніндегі комитетінің мүшесі Бектас Бекназаровтың қатысуымен көшпелі отырыс өтті.
Шараға облыс әкімінің орынбасары Ғали Есқалиев, облыстық мәслихаттың хатшысы Сәния Қалдығұлова, судьялар, прокуратура мен адвокатура қызметкерлері, облыстың құқық қорғау органдарының өкілдері қатысты.
Отырысты облыстық мәслихаттың хатшысы Сәния Қалдығұлова қысқаша сөз сөйлеп ашып, Ұлт жоспарының маңызына тоқталды. Жиында сөз алған сенатор Бектас Бекназаров Мемлекет басшысы Нұрсұлтан Назарбаевтың Ұлт жоспары – 100 нақты қадам бес институттық реформасын жүзеге асыру – бұл жаһандық ішкі сын-қатерлерге жауап және жаңа тарихи жағдайларда дамыған 30 мемлекеттің қатарына ену жөніндегі баянды бағдарлама екендігін атап өтті. «100 нақты қадам» Қазақстан мемлекеттілігін нығайтуға, тура жолдан таймауға, күрделі кезеңнен сенімді өтуге жағдай туғызатын және заң үстемдігін қамтамасыз ететін болады, – дей келіп, ол құқық қорғау орғандарын реформалауға байланысты болатын өзгерістерді түсіндірді. Облыстық соттың төрағасы Ерлан Айтжанов Ұлт жоспарын жүзеге асырудағы заң үстемдігін қамтамасыз ету мәселесі жөнінде баяндады, соттың ашықтығы мен жариялылығына қатысты атқарылған жұмыстарды тілге тиек етті. Оның айтуынша, облыстық сот бейне және аудио құралдармен 70 пайыз қамтамасыз етілген, бұл өз кезегінде сот жұмысының жариялылығы мен ашықтығына алғышарт жасайды. Одан кейін сөз алған облыстық ішкі істер департаменті басшысының бірінші орынбасары Рахат Аханов құқық қорғау органдарындағы өзгерістерді бүгінгі жағдаймен сабақтастырды, алдағы уақытта атқарылар ауқымды істерді айта келіп, бұл бағыттағы ойларын ортаға салды. Әсіресе, жергілікті билікпен қоян-қолтық жұмыс істеудің тиімділігіне баса назар аударды. Сенатор, сондай-ақ, облыс орталығында қоғамдық қабылдау өткізді. Содан кейін Алға және Хромтау ауданының активімен кездесіп, Елбасының «100 нақты қадам» Ұлт жоспарын жүзеге асыруға бағытталған түсінік жұмыстарын жүргізді.
Сатыбалды СӘУІРБАЙ, «Егемен Қазақстан».
Ақтөбе облысы.
