Астанада еліміздің түрлі салаларында қызмет ететін белсенді әйелдердің бастамасымен құрылған «Халықаралық «EXPO&WOMEN» ұйымы» заңды тұлғалар бірлестігінің алғашқы отырысы болып өтті.
Аталмыш ұйымға бизнес, саясат, индустриялық сектор, қоғамдық қайраткерлер және журналистер кіретін болады. Ұйым президенті Салтанат Рақымбекованың айтуы бойынша, «EXPO&WOMEN»-ның негізгі міндеті мемлекеттік органдар, мемлекеттің даму институттары, бизнес пен әйелдер ұйымдары арасындағы ынтымақтастық пен диалогты қамтамасыз ету болып табылады. Ол, сонымен қатар, алдына әйелдерді «Қазақстан-2050» Стратегиясы мен «Нұрлы Жол» бағдарламасын, ЭКСПО-2017 жобасын жүзеге асыруға белсене қатысуға жұмылдыруды, сонымен қатар олардың жұмыспен қамтылу деңгейін жоғарылатуды мақсат етіп қойып отыр. Бүгінгі таңда ұйым бірнеше халықаралық ұйым әлеуметтік жобаларды жүзеге асыруға атсалысып келеді. Олардың арасында тауар өндірушілерге арналған «Халық Маркасы-2015» ұлттық конкурсы, EXPO scheber, International Trade Programm, әйелдер кәсіпкерлігін қолдайтын Design & Art жобасы және тағы басқалар бар. С.Рақымбекованың пікірінше, алдағы уақытта өтетін халықаралық ЭКСПО-2017 «Болашақтың энергиясы» көрмесінің сәтті өтуі Президентіміз Нұрсұлтан Назарбаевтың ХХI ғасырдағы тұрақты даму формуласы ретінде ұсынылған энергоэкологиялық бастамаларын әлем халқы бірігіп белсенді түрде жүзеге асыруына байланысты. Сонымен бірге, халықаралық ұйымдар мен отандық даму институттарының ғаламдық G-Global жобасы аясында қоғам қайраткерлері мен новаторларды біріктіруде әлеуетті мүмкіндіктер тудырады. Қазақстанның «нәзік жандары» осындай маңызды мәселелерді шешуде бейтарап ұстанымда бола алмайды. Белсенді әйелдердің бастамаларына Парламент Сенатының депутаты, G-Global Халықаралық хатшылығының жетекшісі Серік Нөгербеков қолдау көрсетіп, ғаламдық мақсаттары бар жаңа ұйымға көздеген мақсаттарына қол жеткізу жолындағы серпінді жоғалтпауларын тіледі. – Біз әлемдік және отандық интеллект қауымдастықтарымен, соның ішінде тиімді инновациялық жобаларына ресурстарын салатын инвесторлармен тікелей диалог жүргізуге мүмкіншіліктер туғызатын G-Global коммуникативтік тұғырнамасының әлеуетті мүмкіншіліктерін барынша қолдануға тырысудамыз. Бүгінгі күні G-Global тұғырнамасында «ЭКСПО-2017 виртуалды көрмесімен» танысуға болады, ал біздің бастамаларымыз бен жобаларымыз ғаламдық оқиғаларға қызығушылықты арттырып, қазақстандықтарда жаңа ойлау үдерісі «технологиялық» ойды қалыптастыруда қолғабыс болады, – деді С.Нөгербеков осы орайда. Сонымен қатар, отырыста ұйымға мүше болу, Астана мен Миланда өтетін іс шаралар, және Қазақстан мен басқа мемлекеттердегі өкілдіктер туралы сұрақтар талқыланды.
Сәкен МАЙЛЫБАЙ.
