Футзал: Қазақстан құрамасы Португалияны жеңді

АСТАНА. 20 наурыз. Футзалдан 2016 жылғы Еуропа чемпионатына іріктеу турнирі аясында Қазақстан Португалия құрамасын 3:1 есебімен жеңді. Аталған турнирде Қазақстан 7-топта Португалия, Румыния және Грузия құрамаларымен келесі кезең жолдамасын сарапқа салуда. Бұл туралы egemen.kz хабарлады. Ойынның үшінші минутында Португалия алға шықты. Нәтижелі соққының авторы – Рикардиньо. Үзіліске санаулы минуттар қалған кезде қарсыластарымыздың шабуылшысы Кардинал қызыл қағаз алып, алаңнан кетті. Дегенмен, бұл мүмкіндікті біздің футболшылар пайдалана алмады. Қазақстан құрамасы есепті ойынның 28-минутында теңестірді. Әріптестерінен пас алған Николай Пенгрин Португалия қақпашысын қапы қалдырды. Бразилиялық маман Какаудан тәлім алатын футболшыларымыз арада 8 минут өткенде есепте алға шықты. Бұл жолы мергендігімен көзге түскен Михаил Першин болатын. Ал оған нәтижелі пас шығарған қазақ футболшысы Серік Жаманқұлов. Ойын соңында дейін таразы басын теңестіре алмаған Пиреней түбегінің өкілдері тәуекелге барды. Қақпашыны ойыншыға алмастырған олар шабуыл шебін күшейтті. Екінші голды соғуға деген ынтасы соншалық Португалия ойыншылары қорғанысты мүлдем қараусыз қалдырды. Кезекті соққылардың бірінде допты қағып алған Қазақстанның қақпашысы Игита бірден қарсыластың қақпасын нысанаға алды. Доп діттеген жерге дөп түсіп, Қазақстан үшінші голды соқты. Біздің құрама үшін бұл осы турнирдегі алғашқы жеңіс. Әзірге қоржынымызда үш ұпай бар. Сондай-ақ, Португалия да осынша ұпайға ие. Топ басында 6 ұпаймен Румыния келеді. Грузияда әзірге ұпай жоқ. Қазақстан соңғы матчты 21 наурыз күні грузиндерге қарсы өткізеді. Астана уақыты бойынша 21:00-де басталатын ойын біз үшін шешуші болмақ. Алғашқы кездесуде Румыниядан 4:6 есебімен жеңілген едік. Ал Португалия Грузияны 7:0 есебімен тас-талқан етіп жеңді. Еламан Қоңыр. Дерек: egemen.kz. Сурет: kairat-futsal.kz.