Футбол. Астанада Қазақстан Президентінің Кубогы үшін турнир өтуде

АСТАНА. 23 маусым. Кеше Астанада футболдан 17 жасқа дейінгі жастар құрамалары арасында Қазақстан Президентінің Кубогы үшін халықаралық турнир басталды. Биыл VIII рет ұйымдастырылған жарысқа 8 мемлекет қатысуда. Бұл туралы ras.kz хабарлады. Қатысушы командалар екі топқа бөлінді. Оның біріншісінде Беларусь, Әзербайжан, Ресей-2, Грузия командалары болса, екіншісіне Испания, Тәжікстан, Қазақстан, Қырғызстан жастары топтасқан. Испан маманы Карлос Марторелла жаттықтыратын Қазақстан жастар құрамасы алғашқы ойынын Қырғызстанға қарсы өткізді. Бұл ойында есепті қонақтар ашты. Кездесудің 25-минутында Эмир Шыгайбаев мергендігімен көзге түсіп, командасын есепте алға шығарды. Ал алаң иелері тек 68-минутта ғана таразы басын теңестіруге мүмкіндік тапты. Нәтижелі соққының авторы – Сағадат Тұрсынбай. Арада үш минут өткен кезде қазақ ұландары екінші голдарын соқты. Бұл жолы доп Мәди Жақыпбаевтың еншісіне жазылды. Ойынның нүктесін 80-минутта Қазақстан футболшысы Мұхит Жақсылық қойды. Нәтижесінде жастарымыз 3:1 есебімен жеңіске жетті. Кеше өткен өзге ойындардың нәтижелері төмендегідей: Беларусь – Әзербайжан 1:3 Голдар: Ксенофонтов 4 – Мехдиев 23, Асадов 30, Гулер 78. Испания – Тәжікстан 3:0 Голдар: Алехандро 13, Барталонэ 71, Брандариц 79. Ресей-2 – Грузия 0:2 Голдар: Кимеридзе 13, Харабадзе 35. Бүгін 2-тур аясында Беларусь Грузиядан 1:2 есебімен жеңілсе (голдар: Казаков 17 – Спандерашвили 16, Харабадзе 58), Әзербайжан Ресейдің екінші құрамасынан 1:0 есебімен басым түсті (гол: Оксуз 16). Дәл қазір Тәжікстан мен Қырғызстан футболшылары күш сынасуда. Ал Қазақстан – Испания ойыны сағат 19:00-де басталады. Соңғы тур ойындары 25 маусымда ойналады. Бұл сында Грузия – Әзербайжан, Ресей-2 – Беларусь, Испания – Қырғызстан және Қазақстан – Тәжікстан арасындағы ойындарға куә боламыз. Турнирдің финалдық кезеңі 26 маусымға жоспарланған. Әр топтағы бірінші орын алған командалар финалда ойнаса, 2-сатыға табан тіреген құрамалар қола жүлде үшін бақ сынайды. Қалған орындар да осы тәртіп бойынша сарапқа салынады. Еламан Қоңыр. Дерек: ras.kz. Сурет: presidentcup.kz.