Еуропа лигасы. Бүгін «Қайрат» Шотландияда «Абердинмен» ойнайды

АСТАНА. 6 тамыз. Бүгін түнде «Қайрат» УЕФА Еуропа лигасы іріктеу турнирінің үшінші раунды шеңберінде Шотландияның «Абердин» командасымен қарымта кездесу өткізеді. Сырт алаңда болатын матч Астана уақытымен сағат 00:45-те басталады. Бұл туралы egemen.kz хабарлады. Апта бұрын Алматыда ойналған ойында қайраттықтар 2:1 есебімен жеңіске жеткен еді. Сондықтан бүгінгі кездесуде Владимир Вайсстың шәкірттері үшін кез келген тең есеп келесі айналымға шығуға жеткілікті. Соған қарамастан, бас жаттықтырушы «Қайраттың» шабуылға көп күш жұмсайтынын айтты. Бірінші ойында команданың үздік бомбардирі Жерар Гоу алаңға шықпаған болатын. Сондай-ақ, негізгі құрамның ойыншысы Риера да Алматыдағы тартысқа қатыспады. Жаттықтырушының мұндай шешім қабылдауына футболшылардың жаттығу кезінде алған жарақаттары себеп болды. Дегенмен, қарымта ойынға Гоудың қатысуы әбден мүмкін. Себебі, ол командамен бірге Шотландияға барды. Айта кетейік, бұл кездесуді отандық телеарналар көрсетпейді. Еламан Қоңыр. Дерек: egemen.kz. Сурет: nur.kz.