Түркияда апатқа ұшыраған автобуста Қазақстан азаматтары болған

АСТАНА. 6 шілде. Түркияда ірі жол апатына ұшыраған туристік автобуста Қазақстанның жеті азаматы болған. Бұл туралы tengrinews.kz хабарлады. Дереккөздің ақпары бойынша, Қазақстанның Түркиядағы консулдығының қызметкерлері бес қазақстандықпен байланыс орнатты, олар жол-көлік оқиғасынан жарақат алып, ауруханаға түскен. Олардың өміріне қауіп төніп тұрған жоқ. Қазіргі уақытта тағы екі азамат іздестіріліп жатыр. Оқиға Астана уақыты бойынша 19.30-да Түркияның оңтүстік батысындағы Денизли қаласында болды. Туристер автобусы Памуккаледен Анталияға жүріп бара жатқан. Жол-көлік оқиғасынан 4 адам қаза болып, 38 адам жарақат алды. РИА «Новости» агенттігінің нақтыланған ақпарына қарағанда, автобуста Ресейдің, Қазақстанның, Литваның және Беларусьтің азаматтары болған. Айдар Өрісбаев. Дерек: tengrinews.kz. Сурет: mynet.com.