Жақында Қазақстанның Канададағы елшісі Константин Жигалов канадалық Нью-Брансуик провинциясында сапармен болды, деп хабарлады СІМ баспасөз қызметі.
Фредерикто қаласына сапары барысында К.Жигалов провинцияның губернаторы Джоселин Рой Вьеномен кездесті, сондай- ақ, Нью-Брансуик премьерінің орынбасары Стивен Хорсмэнмен, табиғи қорлар, энергетика және тау-кен өндірісі министрліктерінің басшылығымен, «OpportunitiesNB» агенттігінің жетекшілігімен, Сент-Джон қаласы портының әкімшілігімен және провинцияның басқа да өкілдерімен келіссөздер жүргізді. Сапар Канаданың халықаралық сауда-экономикалық және гуманитарлық байланыстарында маңызды рөлі бар канадалық провинциялармен Қазақстанның ынтымақтастығын тереңдетудің болашағы зор екенін растады. Тараптар энергетика, білім беру, шағын және орта бизнес деңгейінде жаңа өзара тиімді байланыс орнатудың қажеттілігін атап өтті. Елшілік жақында осы мақсатта еліміздің экономикасына жаңа инвестициялар тартуды көздеген Қазақстандағы экономикалық мүмкіндіктер туралы іскерлік анықтама басып шығарды. Астанада өтетін ЭКСПО-2017 халықаралық мамандандырылған көрмесі, сондай-ақ, Президент Нұрсұлтан Назарбаев жариялаған «100 нақты қадам» Ұлт жоспары Нью-Брансуик өкілдерінің елеулі қызығушылықтарын тудырды.
«Егемен-ақпарат».
Сурет: http://kapital.kz/
