Кәсіпорынның аты айтып тұрғанындай, зауытта шығарылатын газды бетон блоктары экологиялық таза материал болып табылады. Олардың құрамында химиялық зиянды заттар жоқ, құрылыстың пайдалану мерзімін ұзарту үшін қандай да улы құраммен өңдеуді қажет етпейді. Экоблоктар экологтардың барлық талаптарына сай келеді, айналаға газ бен шаң шығармайды, адам денсаулығына зиян келтірмейді. Өзінің экологиялық тазалығы жағынан тек ағашты ғана алдына салады, алайда, ағаштан артықшылығы – ол шірімейді және тозбайды. Қолданылатын шикізат материалдарының экологиялық тазалығы сертификаттармен бекітілген және қауіпсіздікке кепілдік береді.
– «Экотон-Батыс» зауытын салу 2007 жылы басталды. Зауыт бір жыл ішінде салынып, іске қосылды. Бастапқыда жобалауда қиындық кездесті. Себебі, зауыт орналастырылатын ғимарат он жыл бойы пайдаланылмағандықтан, қайта жарақтандыру жұмыстары қоса жүргізілді. Дегенмен, осындай қиындықтарға қарамастан, зауыт межелі уақытында пайдалануға берілді. 2008 жылы наурыз айында алғашқы өнім өндірілді. Екі ай өткен соң-ақ зауыт жобалық қуатына шықты. Жаңадан іске қосылған кәсіпорынның осынша қысқа мерзімде жобалық қуатына шығуы ұжымның ілгері күнге деген сенімін нығайтты. Бұл ұйымшыл ұжымның алғашқы жеңісі болатын. Жоғары технологиялық қондырғыларды басқаруды игерген кәсіби білікті технологтар, инженерлер мен операторлар жұмысының жемісі еді, – дейді «Экотон-Батыс» ЖШС директоры Нариман Баймұқанов.
Зауытта алғашқыда 600х250х100х400 миллиметрлік ұялы бетон шығарылса, 2009 жылы тұтынушылардың сұранысын қанағаттандыру мақсатында қалыңдығы 80,120,150,250,350 миллиметрлік ұялы бетон блоктары өндіріле бастады. Кәсіпорында Германияның «International GmbH» компаниясының технологияық қондырғысы орнатылған. 2011 жылы ұялы бетоннан белдіктер шығаратын технологиялық желіні орнату жұмыстары басталды, былтыр өндірістің жылдық қуатын 200 мың текше метрден астам өнім өндіруге жеткізетін бесінші автоклав іске қосылды.
Қазір зауыт ырғақты жұмыс істеп тұр. Жергілікті құрылыс компаниялары басқа өңірлерден құм блоктар, ұлутас, кірпіш және басқа материал жеткізгенше, уақыттан да, тасымалдаудан да ұтып, «Экотон-Батыс» ЖШС-ның қабырғалық блоктарын пайдалануды қолай көреді. Зауыттың ұялы бетон бұйымдары өзінің тамаша техникалық сипаттамалары арқасында құрылысшылар арасында анағұрлым берік сенімге ие болуда. Серіктестік өнімдерінің жылу ұстағыш, отқа төзімділік, жеңіл де өнімділігіне байланысты силикат кірпіштен тоғыздан астам артықшылығы бар. Газды бетон блоктары жеңіл де үлкен, сондықтан қабырғаларды тез арада қалауға болады. Ал кірпішке қарағанда ерітінді 5-7 есе аз жұмсалса, қалау шапшаңдығы 3-4 есе артады.
Зауыт өнімдері 2010 жылы «Қазақстанның үздік тауары» қалалық конкурсында «Тұрғындар үшін үздік тауар» номинациясы бойынша бірінші орынды жеңіп алса, сол жылы осы аттас республикалық конкурс-көрмеде «Тұрғындар үшін үздік тауар» номинациясы бойынша үшінші орынға ие болды. 2011 жылы кәсіпорын өнімдері Президенттің «Алтын сапа» сыйлығының конкурсына қатысты. Сол жылы кәсіпорынға «Мінсіз» сапа белгісі берілді.
Кәсіпорын өнімдері негізінен облысқа және Батыс Қазақстан өңіріне шығарылады. Сондай-ақ, Оңтүстік Қазақстанға да өткізіледі. Өткен жылы Ресейдің шекаралас орналасқан Орынбор, Ор қалаларына зауыт өнімдерінің алғашқы тобы жөнелтілді. Серіктестік өнімдерінің сапалылығының арқасында газды блок қабырғалық материалдарына шетелдік тұтынушылар қызығушылық танытты. Нәтижесінде Орынбор облысында серіктестіктің өкілдігі ашылды.
«Экотон-Батыс» ЖШС құрылыс материалдары нарығына қадам басқанына онша көп уақыт бола қойған жоқ. Соған қарамастан, серіктестіктің газды бетон шығаратын зауытының өнімдері тұтынушылардың сұранысына ие болып отыр. Сондықтан да бұл зауыт өңірдегі өзіндік жұмыс ырғағы қалыптасқан кәсіпорындардың қатарына жатады.
Сатыбалды СӘУІРБАЙ, «Егемен Қазақстан».
Ақтөбе облысы.
