Мемлекет тарапынан кәсіпкерлерге жеңілдіктер мен қолдаулар көрсетілу арқасында бұл күнде жеке ісін ашуға мүмкіндіктерді ұтымды пайдалана алушылардың аз еместігі іскерліктің өсуін танытарлық құбылыс саналса, осы орайда Жаңаарқа ауданы бизнесмендері белсенділігі жылдан-жылға күшейіп отыруын айтуға болады. Мәселен, олардың «Бизнестің жол картасы-2020» бағдарламасы аясында берілетін қайтарымсыз грантты өз шаруаларын дамыту үшін ұтымды қолдана білуге ұмтылыстары соны дәлелдейді. Аталған гранттық қаражатты алуға конкурсқа қатысып, одан қолдау табу бойынша кәсіпорындарға инновация бағытындағы ерекшеліктеріне және жаңашыл жобаларға қайтарымсыз негізде, сондай-ақ, кепілзатсыз берілуі өндіріс өрісін жайдыруға қолайлы жағдай туғызуда. Соны іске асырушылардың бірі Күлшат Аманқұлова жетекшілік ететін «Полиситрол» ЖШС-ның бетонды кірпіштерді өндіру көлемін біршама кеңейтуі кәсіпорынға да, жергілікті тұтынушыларға да жақсы қадам болды.
Осы мақсаттағы жобалары қолдау тауып, 3 миллион теңге қайтарымсыз грантына ие болған серіктестік аудан орталығында құрылысқа өте қажетті өнімдер шығаратын кәсіпорын жұмысын жолға қойды. Оның пайдасы бұрын бұл құрылыстық материалды алыстан тасымалдап, артық шығындалуға тап болып отыр. Бір жағынан кірпіштің бағасы тиімді әрі суық өткізбейді. Сондықтан, сұраныс үлкен. Соған сәйкес күніне 14-16 текше метрге дейін кірпіш шығару көлемі одан сайын өсе түсіп жатыр.
Жеке істі дөңгелетуде Күлшат Аманқұлова құрбысындай Майра Қырбасованың да қадамы құтты. «Сауықтыру орталығын» ашу мақсатында 7 пайыздық жеңілдікпен 12 миллион 500 мың теңге несие алынып, тіс емдеудің барлық қызметтерін көрсететін орынның құрылысы аяқталып қалды. «Мұнымен бірге мұнда ауылдық жердегі бірінші сән салоны жұмыс істемек. Тұрмыс жақсарған, талғам өскен заманда жерлестеріміздің бет-әлпет, дене күтіміне деген тілектерін қалайша ескермес емеспіз», дейді ол. Ауданның бизнес саласындағы жағымды жаңалықтардың тағы бірі «Жаңаарқа МТС» жобасы іске асырылуы екенін айтпай өтпеске болмайды. «ҚазАгро» ұлттық басқару холдингінің қолдауы және «Қазагроқаржы» АҚ көмегімен құрылған бұл кәсіпорын мал азығын дайындау, азықтық дақылдар өндіру, көктемгі дала және күзгі жиын-терім жұмыстарын жүргізуге қызмет түрлерін көрсетумен шұғылданады. Ескене ауылында орналасқан машина-трактор стансасы айналасындағы шаруа қожалықтарының 3200 гектар жерін өңдеуді, 1900 гектарға әртүрлі дақылдар мен көпжылдық шөптер егуді, 1000 гектар танапты гербицидпен улауды, 1000 гектарға тыңайтқыш шашуды бастап кетті. Бұлар осы кейінгі кезде жаңадан жарасым тапқан істер. Уақыт талабынан қалмауға сақ, озық үрдістерді өрістетуге құштар жаңаарқалықтар бұл жағынан әрдайым алда.
Айқын НЕСІПБАЙ, журналист.
Қарағанды облысы, Жаңаарқа ауданы.
