Каспий теңізінің Құрық портында паром кешені салынып, құрылысшылар кәсіпкерлер мен кәспорындарға жағалауға шығуға мүмкіндік әперді. «ҚТЖ» ҰК» АҚ бұл жобаны биылғы сәуірде ашқан болатын.
«Таяуда арнайы техникалар саны 200-ге жетеді. Екі ауысымда жұмыс жасауға болады. Биылғы жылғы жоспарымызда теміржолдың топырақ төсемін жасап, Құрық селосынан портқа дейін оптикалық-талшықты ВЛ-110 кВт электр желілерін тартамыз. Ерсай стансасынан теміржолдың кірме телімдерін төсейміз», дейді жобаның бас инженері Марат Дүйсенбаев. Бүгінгі таңда теміржолдың портқа кірме телімдері тегістелуде. Мұнда 4 миллион текше метр жер қабатын алу қажеттілігі байқалады. Қазірдің өзінде құрылысшылар 1 миллион 150 мың текше метр топырақ шығарып, жұмыстың 30 пайызын орындады. Жердің қатты қабатын жару тәсілдері қолданылуда. Құрық порты Ақтаудан жүз шақырым жерде орналасқан. Сондықтан да мұнда Боржақты-Ерсай теміржол желісі төселді. Жаңа теміржол желісімен алғашқы жұмысшы пойыздарын Мемлекет басшысы шілдеде жіберді. Қазір бұл жолмен құрылыс заттары, паром кешеніне қажетті ауыр қорапты қаусырмалар, басқа да тауарлар отандық және шетелдік кәсіпорындардың сұранысы бойынша жеткізілуде. Таяу арада Ерсай стансасынан Құрық портына 14,7 шақырымдық кірмежолдар салынатын болады. Бұл жұмыстармен қатар теңіз аумағының тереңдігін зерттеу жұмыстары да жүргізілуде. Ол жұмыстың аяқталуына байланысты теңіз табанын қазудың әдісі қарастырылады. Сонымен қатар, су айдынын теңіз толқындарынан қорғаныш құралдары батыс бөлігінде 1350 метрге, шығысында 540 метрге орнатылады. Құрылысшыларға жұмыс істеп, уақытында тынығуына қолайлы жағдай жасалған. Вагондардың орнына 150 жұмысшы мен 40 инженер техниктерге арналған шағын қалашық салынады. Қазірдің өзінде жайлы жатақхана, әкімшілік корпус, асхана салынуда. Жылына төрт миллион тонна жүк өткізе алатын паром кешені халық тұтыну тауарларын, астық, мұнай өнімдері, сұйытылған газ, тыңайтқыш, басқа да жүктер тасымалдайды. Портты толық қуатында іске қосу үшін 250 адам тұрақты жұмысқа қабылданады.
«Егемен-ақпарат».
