Ақын жеріндегі саяхат әлеуметтік желіде әспеттелуде

Шығыс өңірінде «Абай же­ріндегі саяхат» атты блог-сапар өтті. Абайдың 170 жылдық мерейтойы аясында Шығыс Қазақстанға арнайы келген блогерлер қауымы бір апта бойы өңірдегі тарихи-мәдени ескерткіштермен танысып, ақынның туған жерінде болды. Сондай-ақ, олар облыстағы ту­рис­тік және спорттық кластердің дамуымен танысты. Блог-сапар бағ­дарламасы облыс орталығын­да бас­талып, әлеуметтік желіні бел­сен­ді қолданушылар Ертістің сол жаға­лауындағы саябақ кешенінде, этно­ауылда, ашық аспан астындағы музейде, Халифа Алтай атындағы облыс­тық мешітте, облыстық драма теат­рында болды. Сонымен бірге, жаңа спорттық нысандар – О.Ры­пакова атындағы жеңіл атлетика манежі, орталық бассейн және жек­пе-жек сарайындағы спорттық клас­тер­ді дамыту жобасымен танысты. – Әсіресе, этноауыл ұнады. Қа­зақ, орыс, корей, белорус, шешен, украин және басқа да ұлттардың қо­нысын көріп, әрқайсысының мәде­ниеті мен тарихынан хабардар бола аласыз. Бұл үйлердегі әр зат – бағалы жәдігер. Негізінен, этнос­тар өздерінің тарихи жәдігер­лерін осын­да орналас­тырыпты. Маған че­шен мен грузиннің қоныс­тары ұнады, – деп жазды ақын ­Т.Таң­жа­рық әлеуметтік желі­дегі жеке парақшасында. Блог-сапар барысында қонақтар облыс­тың туризм саласын дамы­тудағы жобаларымен де танысты. Катонқарағай және Зырян аудандарында ауылдық туризмді дамыту жобалары жөнінде білген олар Берел қорғандары мен марал шаруашылықтарында болды. Белгілі блогер Максим Рожин өз парақшасына: «Абай жеріне саяхат барысында Шығыс Қазақстан өңірін­де мені де, сапарластарымды да қатты таңғалдырғаны – күнбағыс алқап­тары. Жергілікті жігіттердің айтуынша, елімізде егілетін күнбағыстың 80 пайызы осы өңірде жиналады, – деп жазды. Семей қаласында жалғасқан сая­хат арқылы меймандар Абай мерейтойына арналған мерекелік іс-шараларға қатысты. Хакімнің өмірі мен шығармашылығына қатысты тың деректермен танысып, Жидебай-Бөрілі қорық-мұражайында, «Абай-Шәкәрім» мемориалдық кешенінде болды. Сондай-ақ, блогшыларды Шәкәрім атындағы Семей мемлекеттік университетінде өткен «Абай және әлемдік өркениет» атты ғылыми-тәжірибелік конференция мен «Адамзаттың Абайы» атты салтанатқа қатысты. Думан АНАШ, «Егемен Қазақстан».