Футбол. Қазақстан Испаниядан ойсырай жеңілді

АСТАНА. 24 маусым. Астанада футболдан Қазақстан Президентінің Кубогы үшін өтіп жатқан 17 жасқа дейінгі жасөспірімдер арасындағы турнирде Қазақстан құрамасы Испаниядан 0:5 есебімен ойсырай жеңілді. Бұл туралы egemen.kz хабарлады. Ойын барысында испандардың басымдығы анық байқалды. Матчтың 20-минутында Эмбола біздің қақпадан саңылау тауып, есеп ашты. Арада 13 минут уақыт өткенде ол екінші мәрте мергендігімен көзге түсті. Үзіліске дейін таблодағы нәтиже өзгерген жоқ. Екінші таймда қонақтар тағы да жауапсыз үш гол соқты. Кездесудің 57-минутында Мартин есепті еселеді. Сондай-ақ, Бускетс (68) пен Агиэро (78) да еншілеріне бір доптан жазды. Ал Қазақстан құрамасынан Мәди Жақыпбаев пен Батыр Құдайбердіновтің гол соғатын мүмкіндіктері болған еді. Алайда, оларға сәттілік жетіспеді. Жастарымыз үшінші ойындарын ертең Тәжікстанға қарсы өткізеді. Әзірге біздің құрама 3 ұпаймен өз тобында екінші орында келеді. Еламан Қоңыр. Дерек: egemen.kz. Сурет: presidentcup.kz.