“Қазақстан” Орталық концерт залында ине шаншар орын болған жоқ. Германия, АҚШ, Ресей, Түркия, Қытай елдерінің сахнасында өнер көрсетіп жүрген майталман әртістер өздері келіп өнер көрсетіп жатқанда мұндай тарихи оқиғадан кімнің шет қалғысы келеді дейсің. Ресейдің халық әртісі, Мәскеу Үлкен театрында басты партияларды орындаушы Николай Цискаридзенің өнерін бір тамашалап қалғанның өзі не тұрады? Сахнада тау қыранындай қалықтайтын биші қала күніне орыс композиторы Игорь Стравинскийдің музыкасына жазылған “Нарцисс” биін әдейі дайындап әкелген көрінеді. Бақыт таңын аңсаған ғашық жүректің лүпілін жеткізетін шығарма желісі мұндағы жастардың арман-мұратымен үйлесе өріледі. Қай жерде болсын адамзат баласының мызғымас тірлігіне тиек болар махаббат толғамының толағай үмітіне жолығасыз. Тек сол арманның ақжелкен сәулесі өмір айдынына адастырмай алып шықсын деңіз.
Қытайдың балет өнері өкілдерінің қалтқысыз пластикалық қалыбын қайта-қайта көре бергің келетіні ғажап. Халықаралық байқаулардың лауреаттары Цау Шуцы мен Жанг Шидің орындауындағы А.Аданның “Жизель” балетіндегі көріністер қойылымға шығыстық бояу дарытуымен дараланады. Осыған қоса К.Байсейітова атындағы ұлттық опера және балет театрының труппасы А.Бородиннің – “Князь Игорь”, ал Нью-Йорк сити балетінің өнерпаздары Эшли Буде мен Эндрю Вейет Л.Готтшальктің – “Тарантелла”, Берлин Штатсоперден келген Элиза Кабрера мен Михаил Канискин Д.Россинидің – “Grand pas de deux”, Анкара мемлекеттік опера және балет театрының танымал бишілері Өзге Башаран мен Бахри Гюрджан П.Чайковскийдің “Ұйқыдағы ару” балеттерінен күрделі иірімдерді именбей орындап, сүйіспеншілікке бөленді. Құдайға шүкір, мұндай әлемдік есімдер қатарында қазақтың да талантты ұл мен қыздары жетерлік. Соның бірі де бірегейі, бүгінде Цюрих опера және балет театрында өнер көрсетіп жүрген Әлия Танықпаева мен К.Байсейітова атындағы ұлттық опера және балет театрының әртісі Сержан Кәуіковтің А.Аданның “Корсар” балетінен келтірген бір үзік көрінісі үздік өріліп, көкейден кетпестей өрнек қалдырды. Астана аспаны қиялдың қылқұйрығымен желпігендей әсем сазбен толқып тұрды.
Қарашаш ТОҚСАНБАЙ.
* * *
ШАБЫТТЫ ҚЫЗДЫРҒАН “ДЕЖАВЮ”
Аты әлемге мәшһүр опера жұлдызы Дмитрий Хворостовскийдің сазгер Игорь Крутоймен бірлесіп қойған концертін өнерсүйер қауым “Қазақстан” орталық концерт залынан тамашалады. Хворостовский мен Крутойдың бұл жолғы ұсынған “Дежавю” жобасында сан алуан шығармашылық стиль мен түрлі жанрдағы 24 композиция орындалды. Адамның жан дүниесін тебірентер концертте Виктор Поповтың Хор өнері академиясының академиялық хоры және Константин Орбелянның басқаруындағы камералық оркестрі де өз өнерлерін ортаға салды. Арай ҮЙРЕНІШБЕКҚЫЗЫ.
