Тауықты тегін таратпақшы

Қарағанды облысындағы Үштөбе ауылында орналасқан К. Маркс атындағы құс фабрикасы кешеден бері тұрғындарға тауықтарын тегін тарата бастады. Мұндай тосын қадамға олар өнімдерінің өтпей жатқандығынан барып отыр. Аталған құс фабрикасы 2010 жылы өзінің ұзақ жыл тоқтап тұрған өндірісін іске қосып, содан бері тәп-тәуір жұмыс істеп келе жатқан болатын. Алайда, нарық пен бәсекенің қатаң заңы кәсіпорынды осындай қадам жасауға мәжбүр етті. Енді олар 450 мың тауықты 300 мыңға дейін азайтпақшы. Яғни, фабрика тауықтың 30 пайызға жуығын тұрғындарға тегін тарату туралы шешім қабылдады. Кәсіпорын алдындағы мәселе 2014 жылдан бастап туындаған болатын. Сол жылдың соңғы тоқсанында фабрика бөлінген субсидияны толық көлемде ала алмады да, қиын жағдайға тап болды. Құс фабрикасының қолы жетпеген қаржының мөлшері 395 миллион теңгені құрайды. Қайрат ӘБІЛДИНОВ, «Егемен Қазақстан». Қарағанды облысы.