«Жедел жәрдемге» – жедел жәрдем Атырауда осы салаға деп 20 шетелдік көлік берілді

Ел-жұрттың қытығына тиетін, өкпе-ренішін тудыратын жәйттің бірі –«Жедел жәрдемнің» кешігуі. Басы ауырып, балтыры сыздаған жанға үнемі сағаттап кешігіп жететін «жедел жәрдем» «сауықпай-ақ» қойды. «Жедел жәрдем» басшыларынан ұдайы «көлік жетіспейді» деген сылтау алға тартылады. Шынымен солай ма, әлде басқа себебі бар ма? Қалай болғанда да, бұл мәселе Атырау облысының әкімі Бақтықожа Ізмұхамбетовтің халық алдындағы есебінде биыл тағы да көтерілді. Міне, енді арада 5 айға жуық мерзім өткенде, дәлірек айтқанда, кеше облыс әкімі Б.Ізмұхамбетов Атырау қалалық «жедел жәрдем» қызметіне 20 жаңа көлікті табыс етті. Жаңаның аты –жаңа, бұрынғыдай көз үйренген ресейлік «Уаз» емес, Оңтүстік Кореядан шығарылған шетелдік көліктер көздің жауын алардай жұтынып тұр. –«Жедел жәрдем» қызметін жетілдіру жөнінде халықтың тарапынан ұдайы ұсыныс түсіп тұрады. Биылғы есеп беру жиынында да бұл мәселе көтерілген еді. Жергілікті бюджеттен бөлінген қаржыға 20 жаңа көлікті сатып алдық. Енді «жедел жәрдем» қызметі халықтың шақыруларына кешікпей жетуі тиіс, –деп түйіндеді ойын өңір басшысы. Иә, Атыраудай қалаға 20 «жедел жәрдем» көлігі аз емес. Енді «жедел жәрдем» дәрігерлері «Көлік тапшы» деген сылтаумен кешігуді доғаратын шығар. Әрине, мұны уақыт көрсетеді. Жолдасбек ШӨПЕҒҰЛ, «Егемен Қазақстан». АТЫРАУ. Суретті түсірген Рахым ҚОЙЛЫБАЕВ.