Кеше Ақордада Қазақстан Республикасының Мемлекеттік хатшысы Г.Әбдіқалықованың төрағалығымен Шетелде кадрлар даярлау жөніндегі республикалық комиссияның кезекті отырысы өтіп, онда 2016-2020 жылдарға арналған «Болашақ» халықаралық стипендиясын дамыту жоспары қаралды. Отырыста Мемлекеттік хатшы Қазақстан Президентінің «Болашақ» халықаралық стипендиясының әлеуетін Мемлекет басшысының бес институттық реформасын іске асыру жөніндегі «100 нақты қадам» – Ұлт жоспарын іске асыруда кеңінен қолдану қажеттігін атап өтті. «Соңғы кезде осы бағдарлама бойынша 2016-2020 жылдарға дейінгі ұсыныс дайындалды. Ол ұсыныстар қазір «100 нақты қадам» – Ұлт жоспарымен байланыстырылып жатыр. Сондықтан да, Премьер-Министрдің қатысуымен Үкіметте де бірнеше рет қаралды. Енді Елбасына басты ұсыныстарды енгізуіміз керек», – деді Г.Әбдіқалықова.
Бұл ретте Комиссияның өткен жылғы отырысында Мемлекеттік хатшы Қазақстан әлемнің ең дамыған 30 еліне кіру жолындағы қарышты қадамы саналатын Елбасының «Нұрлы Жол» Жаңа Экономикалық Саясаты аясындағы жоғары білікті кадрларды даярлау айрықша маңызға ие екендігіне екпін берген-ді. Кешегі отырыс та білікті кадрлар даярлау мәселесінің әлі де жетілдіріле беретінін көрсетті. Сондай-ақ, Комиссия мүшелері «Болашақ» халықаралық стипендиясының 2016-2020 жылдарға арналған даму жоспарын мақұлдады. Бұл ретте даму жоспарында көзделген «Болашақ» стипендиясын дамытуға және жетілдіруге бағытталған бастамалар талқыланғандығын айта кету керек. Өйткені, еліміздегі ауқымды инфрақұрылымдық даму, жаңа өндіріс орындарын құру және ел өңірлері арасында көлік коммуникацияларының барлық түрлері арқылы бизнес ынтымақтастықты жандандыру үшін де біліктілікке ие жоғары деңгейлі менеджерлерге деген қажеттілікті тудыратыны белгілі жайт. Сонымен қатар, жиында кезекті конкурстық іріктеудің үміткерлеріне стипендия тағайындау мәселелері және азаматтардың өтініштері қаралды. Отырыс қорытындысы бойынша Мемлекеттік хатшы Г.Әбдіқалықова Шетелде кадрлар даярлау жөніндегі республикалық комиссияның жұмысын одан әрі ұйымдастыру бойынша бірқатар нақты тапсырмалар берді.
Асқар ТҰРАПБАЙҰЛЫ, «Егемен Қазақстан».
