АСТАНА. 9 мамыр. Мемлекет басшысы Мәскеуде өткен Ұлы Отан соғысындағы Жеңістің 70 жылдығына арналған әскери парадқа қатысты. Бұл туралы akorda.kz хабарлады.
Сондай-ақ, Нұрсұлтан Назарбаев Белгісіз жауынгер зиратына гүл қою рәсіміне қатысты.
Мәскеудегі мерейтойлық парадқа 16 мыңнан астам әскери қызметші, 194 құрлықтық әскери техника, 143 ұшақ пен тікұшақ қатысты.
Қызыл алаңнан Ұлы Отан соғысындағы әскерилердің формасын киген тарихи жауынгерлік топтар жүріп өтті. Сонымен қатар, ТМД-ға мүше мемлекеттердің Қарулы күштері мен басқа да бірқатар шет елдерден арнайы келген 10 топ Қызыл алаңға сап түзеп шықты. Елімізден парадқа Қазақстан Республикасы Қарулы күштері Құрлық әскерлері әскери институтының курсанттары қатысты.
Жеңіс парадына 2 300-ден астам адам, соның ішінде таяу және алыс шетелдерден ардагерлер шақырылды. Мәскеудегі салтанатты іс-шараларға 30-ға жуық шетелдің мемлекет және үкімет басшылары, халықаралық ұйымдардың жетекшілері қатысты.
Еламан Қоңыр.
Дерек, сурет: akorda.kz.
