Атыраулық Айболат Ыстыбай дзюдодан әлем чемпионы атанды

АТЫРАУ. 10 тамыз. Атыраулық палуан Айболат Ыстыбай Босния және Герцеговина астанасы – Сараевода кадеттер арасында өтіп жатқан дзюдодан әлем чемпионы атанды. Бұл туралы egemen.kz тілшісі хабарлады. Атырау палуандарының арасында Ыстыбаевтардың абыройы аспандап тұр. Бір отбасында тәрбиеленген Нұрболат пен Қанат та, ағаларының ізімен спортқа аңсары ауған Айболат та самбо, дзюдо және қазақ күресімен айналысады. Ағайынды палуандардың жетістіктері де аз емес. Жақында Айболат Ыстыбай Босния және Герцеговина астанасы – Сараеводан алтын медальмен оралды. Ол осында өткен кадеттер арасындағы дзододан әлем біріншілігінде қарсыластарының бәрін айқын басымдықпен жеңіп, әлем чемпионы атанды. Айболат әлемнің әр түкпірінен жиналған 500 спортшының арасынан оқ бойы озып, Қазақ елінің көкбайрағын биікте желбіретіп, Әнұранды шырқату үшін намысқа тырысты. Мақсаты – елдің абыройын аспандату. Сол мақсатына жету үшін барын салды. Жаттықтырушысы Мержан Есмағамбетовтің тәлімін ой елегінен өткізді. Қазақтың намысты, қайсар палуаны 50 кило салмақта алдымен АҚШ, Ресей, Кипр, Грузия палуандарын иппон ұпайымен  жеңді. Алтын медальға қол жеткізетін шешуші сында итальян палуанымен шеберлік байқасты. Шаршы алаңда жан берісіп, жан алысқан сында қазақ палуаны қарсыласының осал тұсын тауып, айқын басымдығын танытты. Осылайша, әлем чемпионы атанған 17 жасар Айболат Ыстыбайдың бұл жеңісі Сараево төрінде көкбайрағымызды көкке көтеріп, Әнұранымызды шырқатты. Жолдасбек Шөпеғұл. Дерек, сурет: egemen.kz.