Тағы бір мұз айдыны ашылды

Өткен сенбіде Мем­­­лекет басшысы Нұр­сұлтан Назар­баев Астанадағы олим­пиа­далық ауқымдағы жа­ңа мұз ­сарайында бол­ды. Ке­шеннің ­ин­­­­фра­­құрылымымен та­нысқан Мем­лекет бас­шысы оның елордада спорт кластерін ­дамыту және қысқы спорт түрлерін ілге­рі­лету үшін маңызы зор ­болатынын атап өтті. – Бүгін біз тағы бір маңызды әлеуметтік нысанның іске қосы­луының куәсі болдық. Оны шынымен де мұз сарайы деуге болады. Өйткені, мұнда 12 мың көрерменге есептелген әлем­дік деңгейдегі арена, Хоккей академиясы, олим­пиадалық бас­сейн бар. Бұл ғимаратты елі­мізге, астанамызға үлкен сый­­лық деп санауымыз керек. Ас­тана қаласы солтүстікте орна­ласқандықтан, спорттың қысқы түрлерін көбірек дамытуға тиіспіз. Қысқы спорттық ойын­дардан алдыңғы қатарда бо­луы­мыз қажет. Ал бұл стадион біздің спортшыларымызды жаңа жеңістерге жігерлендіретініне, осы бір ғажайып спорт түрінің жанкүйерлерін қуантып, бірегей жарыстар өткізетінімізге се­нім­­дімін, – деді Нұрсұлтан Назарбаев­ нысанды аралап көргеннен кейінгі брифинг барысында. Қазақстан Президенті өңірлік және халықаралық турнирлер, концерттер мен өзге де шаралар өткізу қызметі есебінен кешеннің өзін өзі ақтауына қол жеткізу қажеттігін, бұл әлемдік тәжірибеге сай екенін атап өтті. Жалпы алаңы 86 000 шаршы метр мұз сарайы – хоккей корты, жүзу бассейні және Хоккей академиясының ғимараты бар көп функционалды кешен. Президент, сондай-ақ, бүгінде еліміздің біраз облыстарында хоккей стадиондары бар екендігін, ал ҚХЛ-дағы қазақстандық команда жақсы орында келе жатқандығын еске салды. Бұл өте жақсы көр­­сеткіштер. Менің ойымша, осы стадион біздің спортшыларға жаңа серпін береді. Біз осында әлемдік танымал командаларды қабылдайтын боламыз. Сондықтан, мен спортшылар мен жастарға құттықтауымды жеткізгім келеді, – деді Елбасы. Нысанды аралау барысында Мемлекет басшысының назарына кішігірім мұзды шоу ұсынылды. Оны «Барыс» ХК  жас тәрбиеленушілері көрсетті. Қойылымда Қазақстан хоккейінің қазірге дейінгі даму жағдайы көрініс тапты. Сонымен қатар, Елбасы ондағы «Барыс» хоккей клубының фирмалық дүкенін де аралады. Дүкен мұз сарайының бірінші қабатында орналасқан. Онда клубтың символдары бейнеленген заттар қойылған. Айтпақшы, бұл спорт кеше­нінде бүгінде алғашқы шаралар басталып та кетті. Мәселен, 9 тамызда туын көтерген хоккей­ден Қазақстан Президенті ку­бо­гының турнирі осы сарай­да­ өтіп жатыр. Турнирге «Барыстан» бөлек Ресейдің бір­қатар клубтары – Новокуз­нецк­ қа­ласынан «Металлург», Хан­ты-Мансийскіден «Югра» және вла­ди­востоктық «Адмирал» қатысуда. Динара БІТІКОВА, «Егемен Қазақстан». Суреттерді түсіргендер С.БОНДАРЕНКО, Б.ОТАРБАЕВ.