Гандболшыларымыз сары құрлықтың қола жүлдесіне таласады

АСТАНА. 21 наурыз. Индонезияда өтіп жатқан гандболдан әйелдер арасындағы Азия чемпионатында Қазақстан шешуші сынға шыға алмады. Жапониямен болған жартылай финалдық ойында қыздарымыз 21:37 есебімен есе жіберді. Бұл туралы egemen.kz хабарлады. Ойынның алғашқы кезеңінде жапон қыздары 17 мәрте біздің қақпаны дәл көздеді. Өз кезегінде Қазақстан құрамасы бұл кезеңде 11 нәтижелі соққымен жауап қатты. Ал ойынның екінші бөлігінде қарсыластарымыз 20:10 есебімен оңай жеңіске жетті. Енді біздің команда ертең үшінші орын үшін Қытаймен күш сынасады. Ал Жапония Оңтүстік Кореямен чемпиондық атақты сарапқа салады. Айта кетейік, қол добынан Қазақстан әйелдер құрамасы екі рет сары құрлықтың чемпионы атанды. Алғаш рет 2002 жылы топ жарған қазақстандықтар 2010 жылғы Азия чемпионатында бұл жетістіктерін қайталады. Сондай-ақ, екі рет 4, үш мәрте 5-орын алған Қазақстан құрамасы әзірге құрлықтың күміс және қола жүлдегері атанып көрген жоқ. Еламан Қоңыр. Дерек: egemen.kz. Сурет: nur.kz.