Бұл – он бес жылдық тарихы бар өнер ошағының шығармашылық еңбегінің нәтижесі.
«Мұны ұжым еңбегінің бағаланғаны деп білеміз. Бір жағынан, жастарға тың серпін береді. Шығармашылыққа жаңа жол ашады. Ең бастысы, театрымыздың кәсіби деңгейі мемлекет тарапынан мойындалып отыр. Енді өнер ордасының республикалық деңгейде танымалдылығы артады деп сенеміз», дейді театр режиссері Бағдат Әшім.
Театр атауы «Шаңырақ» деп бекер қойылмаған. Еуразия ұлттық университеті әлеуметтік және азаматтық даму департаментінің директоры Жамбыл Тілептің айтуына қарағанда, «шаңырақ» – қазақ үшін қастерлі ұғым. Өнерге құштар жастар осы шаңырақтың уығындай бірігіп, ұлттық құндылықтарды дәріптеуді мақсат еткен.
Өнер ұжымының репертуарында отандық драматургтермен бірге, шетел авторларының да шығармалары бар. Мәселен, С.Жүнісовтің «Жаралы гүлдер», М.Байжиевтің «Тіл табысқандар», Ә.Оразбековтің «Бір түп алма ағашы», М.Ладоның «Болмаған оқиға», М.Шахановтың «Танакөз», Ж.Жұматтың «Мұңмен алысқан адам» (ағылшын тілінде), Қ.Жүнісовтің «Ғашықтар хикаясы» секілді қойылымдар көрермен ықыласына бөленген.
Сондай-ақ театр қалалық, республикалық, халықаралық фестивальдарға қатысып, бірқатар жүлделі орындарға қол жеткізген. Айталық, Семейде өткен республикалық студенттік театр фестивалінде ІІ орын иеленсе, Әзербайжанда өткен «Каспийский бриз» ІІІ халықаралық тәуелсіз театрлар байқауында бас жүлдені жеңіп алған.
