АСТАНА. 11 мамыр. Қызылорда облысы, Қазалы ауданында Ұлы Жеңістің 70 жылдығына орай аудан орталығы Әйтеке би кентінде Tour de Qazaly веломарафоны өтті. Оған 80-нен астам ерікті қатысты. Бұл туралы egemen.kz хабарлады.
Әйтеке би-Басықара-Әйтеке би бағытында өткізілген сайыста 15-тегі жеткіншектен жасы келген қарияға дейін бақ сынады. Жарыс жолының ұзақтығы 45 шақырымды құрады.
Әйтеке би кенті әкімдігінің қолдауымен «Заң заңғары» жауапкершілігі шектеулі серіктестігінің жүлдесі үшін ұйымдастырылған шараның мақсаты – салауатты өмір салтын насихаттау, халықты спортпен белсенді айналысуға тарту.
Жарыс қорытындысы бойынша студент Жанболат Сәду қарсыластарын шаң қаптырып, бірінші орынды иемденді. Соған сәйкес, 50 мың теңге ақшалай сыйлықты қанжығасына байлады. Ал 2-орынды №249 мектеп-лицей оқушысы Дәурен Бекет алса, үздік үштікті Бағдат Абикенов түйіндеді. Жеңімпаздарға қаржылай сыйлықтар табысталды.
Бұдан бөлек 10 спортшыға арнайы диплом мен «Алтын орда» фитнес-клубына 12 рет тегін кіруге сертификат табысталды. Сондай-ақ, Жансейіт Тасболатқа 2016 жылы Алматы қаласында өтетін веломарафонға жолдама табыс етілді. Ал ерлерден қалыспай жарысқа түскен Әсем атты қыз бала арнайы жүлдеге ие болды.
Еламан Қоңыр.
Дерек, сурет: egemen.kz.
