Қарағандыда айуандықпен адам өлтірген жас жігіт қолға түсті

АСТАНА. 12 мамыр. Қарағанды қаласында қызды айуандықпен өлтіріп, денесін бөлшектеп тастаған қылмыс туралы осыған дейін хабарланған еді. Облыстық ішкі істер департаментінің жедел-іздестіру шаралары нәтижесінде Қарағанды облысы Осакаров ауданының тұрғыны, 23 жастағы жігіт қолға түсті. Бүгінде ол аса ауыр қылмыс жасағанын мойындаған. Бұл туралы NewTimes.kz хабарлады. Қарағанды облыстық ішкі істер департаментінің баспасөз қызметі таратқан мәлімдемеде: «9 мамырда Қарағанды қаласының Қазыбек би ауданындағы жылу құбырларының бірінен 26 жастағы әйел адамның мүрдесі табылды. Оған іс-түссіз жоғалып кетуіне байланысты 6 мамырдан бастап іздеу жарияланған болатын. Қолға түскен 23 жастағы жас жігіт қылмысты мойындап, ұрыс-керіс кезінде қызды өлтіргенін айтты. Соңында қылмысын жасыру мақсатында қыздың денесін бөлшектеп, тығып қойған», – делінген. Еламан Қоңыр. Дерек, сурет: NewTimes.kz.