Суреттерді түсірген – Ерлан ОМАР, «ЕQ»
Сыр өңірінде биылға жоспарланған жұмыспен қамтудың жол картасында 46 560 жұмыс орны ашылатыны межеленсе, 11 ай қорытындысында бұл жоспар 92% орындалды, оның 65,3%-ы немесе 27 964-і – тұрақты жұмыс орындары. Жыл басынан бері атаулы көмек алатын, мүмкіндігі шектеулі, көпбалалылар мен асыраушысынан айрылғандар арасынан 1 556 адам өзінің кәсіпкерлік бастамасына 1 572 800 теңгелік қайтарымсыз мемлекеттік грант алды.
Осы жылға белгіленген квотаға сәйкес 76 мүгедектігі бар адам жұмысқа орналасып, жылдық жоспар 100%-ға орындалды. Облыс әкімдігінің қаулысымен келесі жылы 64 мекемеге 81 тұрғынды жұмысқа орналастыру жөнінде квота бекітіліп отыр.
Былтыр мүгедектігі бар адамдарды оңалтудың жеке бағдарламасын орындауға республикалық және облыстық бюджеттен 6,8 млрд теңге бөлінсе, биыл қаралғаны 8,3 млрд теңге болып отыр. Қазіргі мәліметке сәйкес, әлеуметтік қызметтер порталы арқылы 35 604 мүгедектігі бар адамның 33 368-і техникалық оңалту құралдарымен қамтамасыз етіліп, көрсеткіш 93,8%-ды құрады.
Облыста инватакси қызметін 67 автокөлік жүзеге асырады. Биыл осы салаға бюджеттен 268,9 млн теңге бөлініп, жыл басынан бері 1 742 адам инватакси қызметімен қамтылды. Бір айта кетерлігі, мүмкіндігі шектеулі жандардың жүріп-тұруын жеңілдетіп, қоғамға араласуына жағдай жасауға аймақта жұмыс істеп жатқан компаниялар да үлкен үлес қосып отыр. Жуырда ғана Қызылордадағы жылу-электр орталығының құрылысын жүргізіп жатқан «INTERTASCO» ЖШС облыстық мүгедектер қоғамына инватакси автокөлігін сыйға тартып, сауапты істен сырт қалмайтынын көрсетті.
Былтырдан бастап «Арнаулы әлеуметтік қызметтер көрсету балалар орталығы» базасында іске қосылған «Үй жағдайында мүгедектігі бар балаларды оңалту» жобасы аясында «Қазақстан халқына» қоғамдық қоры тарапынан 283 млн теңгеге мүгедектігі бар балаларды оңалтудың 95 құралы жеткізіліпті. Бүгінде реабилитолог-мамандар 142 балаға осы жабдықтарды пайдалануды үйретіп жатыр.
Мемлекет ешкімді қолдаусыз қалдырмайды. Бірақ әлеуметтік көмек шын мұқтажға жетуі керек. Олай дейтініміз, осы күні ай сайын үйіне кіріп отырған табысын жасырып, мемлекет көмегіне де ортақтасатындар жоқ емес. Бұлайша «екі жеп, биге шығатындардың» әрекеті өскелең ұрпақ тәрбиесіне де теріс әсерін тигізеді. Қоғамды «Дайын асқа тік қасық» деген осындай ұстанымнан арылту мақсатында қазір мониторингтік топтар да жұмыс істеп жатыр.
«Осы топ жұмысының нәтижесінде кейінгі үш жылда әлеуметтік көмек алатындар 3,2% төмендеп, 5,4 млрд теңге үнемделді. Биыл да негізсіз көмек алушыларды 33 759 адамнан 27 007-ге төмендету жоспарланған. Облыста учаскелік комиссиялар құрамы жаңарып, барлық ауданда үйлерді аралап, атаулы әлеуметтік заңсыз алып отырғандарды анықтау арқасында өткен жылдың осы кезеңімен салыстырғанда көмек алатындар қатары азайды. Көп отбасында сонда тұрып жатқан табысы бар адамдар тіркелімнен шығып, үйде тек жұмыс істемейтіндер қалған. Жеке кәсіпкерлерде жұмыс істейтіндердің жалақысын азайтып көрсеткендері де аз емес. Осы бағытта салық органдарымен жұмыс істеп, шын табысын жасырғандар анықталды. Мемлекетті майшелпекке айналдырып келгендердің біразы негізсіз алған қаржысын сотқа дейін төледі», дейді облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Жанар Дәулетбаева.
Осыдан екі жыл бұрын Қызылорда, Байқоңыр қалалары мен барлық ауданда ашылған отбасын қолдау орталықтары қазір жүйелі жұмыс істеп тұр. Олардың қызметін қамтамасыз етіп, жұмысын үйлестіруге биылға 449,3 млн теңге қарастырылған. Орталықтар отбасыларға заңгерлік, психологиялық көмек көрсетуден бастап кәсіпкерлік негіздеріне оқыту, бизнес-жоспар құрып, грант, шағын несие алуға, жұмысқа орналасуға көмек көрсетеді.
Қазірде еңбек нарығындағы жағдайға байланысты жұмысыңыздан, түрлі жағдай себебімен кәсібіңізден айырылып қалу оңай. Өңірде осындай қиын жағдайға ұшыраған адамдарды анықтап, оларға қолдау көрсетуді ұйымдастыратын 1 561 мобильдік топ құрылған. Олар маусым айынан бастап қолданысқа енгізілген «FSM Social» бірыңғай цифрлық платформасы арқылы 975 әлеуметтік қолдау шарасы жайлы хабарламаны тіркеді. Оның 395-сі бойынша нәтиже бар, қалған 580 азаматты оңалту шараларына қатысты салалық органдармен бірлескен жұмыс жүріп жатыр.
Биыл басқармаға қарасты 5 арнаулы әлеуметтік қызметтер көрсету орталығы арқылы стационарлық, жартылай стационарлық жағдайда барлығы 2 746 адамға арнаулы әлеуметтік қызмет көрсетілді. Облыстық бюджеттен бөлінетін қаржы көлемі артып, орталықтардың материалдық-техникалық базасы жыл сайын жаңартылып отыр.
«Өңірде қолдауды қажет ететін жандарға бюджеттен тыс көмек жүйелі түрде көрсетіліп келеді. Компаниялар мен жеке кәсіпкерлер түрлі мереке қарсаңында көпбалалы, әлеуметтік жағдайы төмен, мүгедек жандарға қайырымдылық шараларын жасап отырады. Тұрғындар жағдайына байланысты кәсіптегі азаматтарға өтініш жасайтын кезіміз де бар. Мысалы, жақында ғана көп жылдан бері төсек тартып жатқан анасына арнаулы кереует сұраған қала тұрғыны келді. Мүгедектер порталы арқылы керекті жабдықтарды жеткізіп беретін кәсіпкерлерге өтініш айтып, олар дер кезінде қажетті тауарды алып берді. Ондай азаматтардың көпшілігі жасаған көмектерін жариялауды жөн көрмейді», дейді басқарма басшысының орынбасары.
ҚЫЗЫЛОРДА
