Елімізде жаңа тұрғын үйдің бағасы арзандады

АСТАНА. 12 мамыр. Сәуірде республика бойынша жаңа баспананың 1 шаршы метрінің орташа бағасы 225 084 теңгені құрады. Бұл туралы Қазақстан Республикасы Ұлттық экономика министрлігі статистика комитетіне сілтеме жасап, total.kz хабарлады. «2015 жылдың сәуірінде өткен аймен салыстырғанда тұрғын үйді жалға алу құны 0,5 пайызға көтерілген. Ал тұрғын үйді қайта сату – 0,5 пайызға, толық жадбықталмаған баспананы сату – 0,4 пайызға, жаңа үйлерді сату – 0,2 пайызға арзандаған», – делінген комитет таратқан ақпаратта. Министрлік ұсынған мәлімдемеде сәуір айында республика бойынша жаңа тұрғын үйдің 1 шаршы метрінің құны орташа есеппен – 225 084 теңге, тұрғын үйді қайта сату – 173 345 теңге, толық жабдықталмаған баспананы сату – 100 659 теңгені құрағаны туралы да айтылады. Тұрғын үйді жалға алу бағасы – 1 259 теңге (шаршы метрі үшін). Дегенмен, 2015 жылдың қаңтар-сәуір айларындағы деректерді өткен жылдың осы мерзімімен салыстырғанда, бағаның өскенін байқауға болады. Мәселен, жаңа тұрғын үйді сатуда баға өсімі 4,4 пайызды құраса, баспана мен толық жабдықталмаған тұрғын үйді қайта сату – 6,8 пайызға қымбаттаған. Ал тұрғын үйді жалға алу құны 7,5 пайызға дейін өскен. Еламан Қоңыр. Дерек: total.kz. Сурет: kapital.kz.