Спорт • 09 Қаңтар, 2026

Жарыс күнделігі

10 рет

көрсетілді

2 мин

оқу үшін

Алматының «Қайрат» футбол клубы БАӘ-де оқу-жаттығу жиынын өткізіп жатыр. Команда құрамында тек Дастан Сәтпаев, Олжас Байбек, Азамат Тұяқбаев жоқ. Олар жарақаттарын емдеп жүр. Жерлестеріміз Парсы шығанағында екі жолдастық кездесу өткізуді жоспарлап отыр. 9 қаңтарда Әзербайжанның «Нефтчиімен», 14 қаңтар-да Хорватияның «Вараждинасымен» шебер-лік байқасады. Жалпы, биыл «Қайраттың» алдында екі үлкен мақсат тұр. Біріншісі, былтырғы маусымда Қазақстан Премьер-лигасында жеңіп алған чемпиондық атағын биыл да сәтті қорғау. Екіншіден, УЕФА Чемпиондар лигасында мүмкіндігінше мол ұпай жинауға тырысу. Әзірге Рафаэль Уразбахтин баптайтын команда алты ойыннан кейін бір ғана ұпайға иелік етті. Осы жарыс аясында «Қайрат» 20 қаңтарда Бельгияның «Брюггесін» қабылдаса, 28 қаңтарда Лондонға сапар шегіп, жерігілікті «Арсеналмен» күш сынасады.

Ғалым СҮЛЕЙМЕН

Биылғы маусымды дзюдошылар 7–8 ақпан аралығында Парижде өтетін Grand Slam турнирінен бастайды. Аталған жарыста еліміздің намысын сегіз спортшы қорғайды. Олар – Шерзод Давлатов (60 кг), Ғұсман Қырғызбаев пен Бауыржан Нарбаев (66 кг), Абылайхан Жұбаназар (81 кг), Айдар Арапов (90 кг), Нұрлыхан Шархан мен Марат Байқамұров (100 кг). Әйелдер сайысында жалғыз Әбиба Әбужақыноваға (48 кг) сенім артылып отыр.

Қазақстан футбол федерациясы (ҚФФ) биылғы маусымның жарыстар кестесін жариялады. Еліміз суперкубогінің финалы 28 ақпанда «Астана аренада» өтеді. Бас жүлде үшін тартыс Алматының «Қайраты» мен Қостанайдың «Тобылы» арасында өрбиді. Арада дәл бір апта өткеннен соң Премьер-лига ойындары басталады. Бұл доп додасы коңыр күзге дейін созылады.

Қазақ теннисшісі Аружан Сағандықова ITF W15 сериясындағы турнирдің жұптық сынында жеңімпаз атанды. Үндістанның Ахмедабадында ұйымдастырылған жарыста ол ресейлік Мария Головинамен бірге барлық бәсекеде басым түсті. Финалда Аружан мен Мария жапон қыздары Ману Кавамура мен Хонока Кобаяшиді 6:3, 6:2 есебімен қапы қалдырды. Бұл – Сағандықованың спорттық мансабындағы ITF санатындағы бесінші титулы, жұптық сайыстағы үшінші жеңісі.