Дубайда «Ғazaa» жарысы басталды

АСТАНА. 24 ақпан. Дубайда осымен жетінші рет ұйымдастырылып отырған «Fazaa» атты халықаралық паралимпиадалық жарыс басталды. Қазақстандық жеңіл атлетшілердің үшеуі алғашқы күні жүлделі болды. Бұл туралы Дене мүмкіндіктері шектеулі тұлғаларға арналған спорттық даярлау орталығы хабарлады. «Fazaa» атты бұл паралимпиадашылар бәсекесі әлемдегі деңгейі биік, әйгілі жарыстардың бірі. Жарыс соңынан үздік спортшыларға Халықаралық Паралимпиада Комитеті тарапынан «Гран-при» жүлдесінің табыс етілуі де аталмыш бәсекенің салмағын айқындай түссе керек. Ақпанның 26 жұлдызына дейін жалғасатын дүбірлі додада 45-тен астам мемлекеттің 500-ге жуық паралимпиадашылары бақ сынауда. Дубайға Қазақстаннан 34 спортшы аттанған. Кеше жерлестеріміздің алғашқы олжалары туралы сүйінші хабар жетті. Қазақстандық жеңіл атлеттер алғашқы күннен-ақ суырылып алға шыға бастады. Аманат Қалқаев (суретте) ұзындыққа секіруден қашықтықты 5,34-ке жеткізіп, әзірге 3-орынға табан тіреді. Ал Мағжан Нұрлыбаев болса, 100 метрге жүгіруден күміс жүлдені жұлып түсті (уақыты – 12,07). Диск лақтырудан Алексей Лукутин де бір қола медальді еншілеп үлгерді (нәтижесі – 16,88 м.). Сөйтіп, біздің паралимпиадашылар алдағы әлем чемпионатына қатысуға мүмкіндік беретін 2 жолдаманы иеленді. Жолдыбай Базар. Сурет, дерек: Дене мүмкіндіктері шектеулі тұлғаларға арналған спорттық даярлау орталығы.