75 жастағы әйгілі теннисшіге қыз зорлады деген айып тағылды

АСТАНА. 24 наурыз. Оңтүстік Африка республикасының соты теннистен «Уимблдон» турнирінің жұптық сынында бес дүркін жеңімпаз атанған Боб Хьюитті қыз зорлады және сол мақсатта күш қолданды деген күдікпен қамауға алды. Бұл туралы lenta.ru хабарлады. Кеше алғашқы сот отырысы өтіп, бас қазы Берт Бам үш жәбірленуші әйелдің сөзін жақтады. Ол: «Үшеуінің келтірген деректері өте ұқсас. Сондықтан Хьюитті алдын ала дайындалған жоспар бойынша әрекет етті деуге толық негіз бар», – деді. Әйтсе де, бұрынғы теннисші өзіне тағылған айыпты мойындаған жоқ. Айта кетейік, ОАР сотына осы жылдың ақпан айында 75 жастағы Хьюиттің үстінен өзінің бұрынғы шәкірті арызданған. Онда шағымданушы тарап 1990 жылдары Бобтың қол астында жаттыққанын, айтып: «14-тен 17 жасыма дейін үш жыл Боб Хьюиттен тәлім алдым. Сол кезде ол дәл корттың ортасында мені зорлады», – деген. Бұған дейін де жасы келген спортшының үстінен осындай екі арыз түскен. Ол кезде қылмыстық із қозғалып, тіпті 2012 жылы теннистің Халықаралық даңқ залынан аты алынып тасталды. Боб Хьюиттің есімі ол жерге 1992 жылы енгізілген еді. Аталған спортшы жұптық сайыс бойынша «Үлкен Дулыға» турнирлерінің тоғыз дүркін жеңімпазы. Соның бесеуіне «Уимблдон» турнирінде қол жеткізген. 1964 жылға дейін Австралия атынан сынға түсіп келсе, кейін ОАР-ға қоныс аударып, сол елдің намысын қорғады. Спортшы ретінде ол барлығы 600 мың доллар табыс тапқанын айта кетейік. Еламан Қоңыр. Дерек: lenta.ru. Сурет: gotennis.ru.