ҚЫЗЫЛОРДА. 12 мамыр. Қызылорда облысы Шиелі ауданы Ш.Қодаманов ауылында Жеңіс күніне орай 150 орындық ауылдық клуб ашылды. Бұл туралы egemen.kz тілшісі хабарлады.
Шараға ардагерлер мен ауыл тұрғындары қатысты. Облыс әкімі Қырымбек Көшербаев барша ауыл тұрғындарын Жеңістің 70 жылдығымен құттықтап, жаңадан іске қосылған мәдени ошақтың жұмысымен танысты.
«Елбасының қамқорлығының арқасында біздің елімізде мәдениет саласын дамытуға қажетті жағдайлардың барлығы жасалған. Әсіресе, ауылдың мәдениетін көтеру, көркейту – басты міндеттердің бірі. Бұл бағыттағы жұмыстар Сыр өңірінде жүйелі жүзеге асуда», – деді аймақ басшысы.
Шара барысында облыс әкімі Ұлы Отан соғысының ардагерлері Б.Дүйсенов пен В.Кривенкоға «Жеңістің 70 жылдығы» медалін табыс етті.
Екі қабаттан тұратын ғимарат заманауи талапқа сай салынған. Клубта мыңнан астам қоры бар кітапхана және сурет, музыкалық білім беретін үйірмелер жұмыс жасайтын болады.
Айта кетйік, биыл облыс бойынша 8 мәдени нысанның құрылысына мемлекеттік қазынадан 3 миллиард теңге қаржы бөлініп отыр. Оның ішінде 7 ауылдық клуб және мұражай мен кітапхана құрылысы да бар. Жыл соңына дейін облыс бойынша осындай 6 нысан пайдалануға беріледі деп жоспарлануда.
Ержан Байтілес.
Дерек: egemen.kz.
Сурет: Бағдат Есжанов.
