Шетелдік ұстаздарға ерулік берілді

Мағжан Жұмабаев атындағы облыстық әмбебап ғылыми кітапханасында Қазақстан халқы Ассамблеясы жылы құрметіндегі кезекті танымдық шара өткізілді. Басқосуға Көкшетау қаласындағы Назарбаев зияткерлік мектебінде ұстаздық етіп жүрген Ниел Руан (Ұлыбритания) мен Нирмала Говендер (ОАР) ерулік жоралғысымен шақырылды. Білім ошағының атшапты­рым оқу залының төріне қазақтың киіз үйі тігіліп, бар жасауымен жарқырап тұр. Көкшенің бү­гін­гі серілері ән шырқап, күй тө­гілтті. Босағадан аттаған қо­нақтарға шашу шашылып, кең-мол дөңгелек үстелге шақырылды. Дастарқан қазақ халқының ұлт­тық тағамдарымен ғана емес, қа­ладағы өзге ұлт өкілдерінің асыл дәмдерімен толтырылған. Қонақтар бал бауырсақ, кү­рең қымыз бен шұбаттан дәм тат­қаннан кейін, облыстық мұсыл­ман әйелдері лигасының мүшесі, сексен жастағы Кәбира Сақы­пова әжеміз халқымыздың арғы-бергі тарихынан әңгіме бастады. «Ерулік» дәстүрінің жай-жап­сары, терең мәні түсіндірілді. Зият­кер­лік мектептің оқушысы Балым Кен­жебаева ағылшыншаға аударып отыр. Ниел бауырымыздың қойын дәп­теріндегі жазу қалыңдай бастады. Өзге ұлттың өкілдері де қо­нақ­кә­де­сін жасап, қаладағы татар, неміс, славян, поляк этномәдени орталық­тары­ның жетек­шілері Мударис Абдул­лин, Свет­лана Корнеева, Галина Булы­­чева және Людмила Суховецкая атал­­ған бір­лестіктердің қоғамдағы орны жайлы хабардар етті. Сон­дай-ақ, Қазақ­стан халқының досты­­ғы, еліміз­дегі ын­тымақ-бірлік та­қы­ры­бында 15 жыл бойы еңбек­­­теніп, 6 альбом дайында­ған мәдениет­танушы Сипат Тасова жәдігерлерінің таныс­тырылымы өткізілуі жұртшылықтың қызығушылығын тудырды. Африкалық қыз Нирмала Говендер қошеметші қауыммен қосылып би билеп, өз тілінде ән шырқады. Ал сэр Ниел Руан Англияда диаспоралық қауым­дастық болғанымен, барлық ұлт­тың басын біріктіретін ұйымның жоқтығын тілге тиек етті. – Бұл Қазақстан Президен­ті­нің көре­ген саясатшы, ұлттарды ұйыстырушы тұлға екендігін көрсетеді, – деді ол. – Ассамблеяның қазіргі дағдарысты кезең­де кезектен тыс президенттік сайлау өткізу жөнінде бастама көтеруінің өзі оның зор бедел мен ықпалға ие екендігін айқын­дай түседі. Мен Көкшетаудағы Назар­баев зияткерлік мектебіне шақыру алға­нымда қуана келістім. Мұндай білім ошағы көп елде кездеспейді. Менің қазіргі оқушыларым өте алғыр, ағылшын тілінде еркін сөйлеседі. Қазақстандық ЭКСПО-ға дайындығымыз да жаман емес. Оның үстіне, кезінде ЭКСПО-да шырқалған «Балқа­диша» әніндегі Қа­диша Көкше­тау­дың қызы екендігін біл­ген­­­дегі таң­ғалысымды сөзбен жеткізу қиын. Кездесу соңы этномәдени бір­лес­тіктердегі көркемөнерпаздар ұйым­дарының концертіне ұласты. Бақберген АМАЛБЕК, «Егемен Қазақстан». Ақмола облысы. Суретті түсірген Айбек ДАНИЯРОВ.