ӨҢІРДІҢ ЕҢ ҮЗДІК ДӘРІГЕРІ

АТАҒЫН ИЕЛЕНГЕН ТАЛҒАРЛЫҚ АҚ ХАЛАТТЫ АБЗАЛ ЖАНҒА ЕКІ БӨЛМЕЛІ ПӘТЕР КІЛТІ ТАПСЫРЫЛДЫ “Саламатты Қазақстан” 2011-2015 жылдарға арналған бағдарламасын көпшілік талқылауына ұсынылуы тегін емес. Өңірде осыған орай алға қой­ған міндеттер ауқымды және оны іске асыруға мүм­кіндік пен әлеует жеткілікті деуге болады. Осы­лайша халыққа көрсетілетін медициналық қыз­меттің әлемдік стандарттарға сай және қол­же­тімділігін қамтамасыз ету жайына назар аударылуда. Соңғы екі жылда екі облыстық ауруханада са­ни­тарлық авиация бөлімдері, Талдықорғанда әйел­дер консультациясы, балалар емханасы мен кар­диохирургия бөлімдері ашылып, көпшілік тала­бы оң шешілгенін айтуға болады. Сондай-ақ, “100 мектеп, 100 аурухана” бағдарламасы бой­ын­ша өңірдегі алты мекеменің құрылысы жүргізілсе, оның төртеуі биыл пайдалануға берілмек. Олар­дың қатарында Талғар, Еңбекшіқазақ орталық аудандық ауруханалары, Өтеген батыр кентіндегі аймақтық балалар ауруханасы, Алакөл ауданы Достық кентіндегі ауылдық аурухана халық игілігіне қызмет етеді. Сондай-ақ “Жол картасы” бағдарламасымен 43 емдеу мекемесіне 1,3 млрд. теңгеге күрделі жөндеу қолға алынып, құрылыс жұмыстарына 1633 адам тартылып, бөлінген қаржының дені игеріліпті. Ана мен бала денсаулығын қорғау жолында да кешенді шаралар қолға алынып, жаңа туған нәрестелердің өмірін сақтау мақсатында облыс бюджетінен бөлінген қаржыға аса қажетті 30 СИПАП, 73 кювез, 30 өкпеге жасанды дем бере­тін аппарат пен медициналық құрал-жабдықтар алынған. Дәрігерлердің кәсіби біліктілігін жетіл­діру мақсатындағы жұмыстардың тиянағын кел­ті­руге де бар мүмкіндік жұмылдырылған. Нәти­же­сінде ауылдық жерде еңбек ететін медицина қыз­меткерлеріне жергілікті бюджеттен ком­мунал­дық қызмет шығындарын өтеуге 25 пай­ыздық өтемақы төленсе, соңғы екі жылда ғана емдеу мекемелеріне қосымша бес мыңға жуық штат бірлігі алынғаны да қуанышты. Саланы білікті мамамандармен толықтырудың бір жолы жас кадрларды тарту және оларды тұрғын үй, жер телімдерімен қамтамасыз ету мәселесі де жолға қойылған. Қазіргі кезде облыс әкімінің арнайы грантымен 68 студент жоғары оқу орындарында дәрігерлік мамандыққа оқытылса, жұмысқа келген 52 жас дәрігерге пәтер беріліп, жұмыс істеуіне жағдай жасалған. Облыс әкімінің тікелей қолдауымен биыл халықтың денсаулығын күзетуде мейірім шуағы, аялы алақанымен қызмет атқарған дәрігерлер арасында облыстық байқау жарияланып, түпкі мақсат жолындағы жұмыс сараланған еді. Меди­цина қызметкерлерінің төл мерекесі қарсаңында оның қорытындысы шығарылды. Жүздеген әріп­тестерінің арасынан талғарлық терапевт-дәрігер Бекзат Алпамышова “Облыстағы ең үздік дәрігер” атағына ие болып, оған облыс әкімі Серік Үмбе­тов Талдықорған қаласынан екі бөлмелі пәтердің кілтін салтанатты жағдайда тапсырды. Бұдан кей­інгі орынға Талдықорған қалалық емханасының дәрігері Ғалия Қожахметова ие болып, мерей­ленді. Өзге де өз ісінің майталмандары марапат­талып, еңбектерінің өтеуін көрді. Байқау дәрігерлердің кәсіби біліктілігін, қа­білетін, емделушілерге қызмет көрсетудегі ұм­ты­лы­сы мен еңбегіне жол ашатынын тағы бір байқатты. Күмісжан БАЙЖАН, Алматы облысы.