Көрменің көрермені көбеймек

Жуырда Тәуелсіздік сарайында Суретшілер одағының ұйымдастыруымен «Нұрлы Жол белестері» атты көрме өз жұмысын бастап кетті. Бір айға жуық жалғасатын бұл көрмеге астаналық қылқалам шеберлерінің туындылары мен зергерлік бұйымдары қойылып отыр. Ондағы басты мақсат – «Нұрлы Жол» бағдарламасын қолдау және Мемлекет басшысы Н.Назарбаевтың Қазақстан халқына Жолдауындағы: «Отанды сүю – бабалардан мирас болған ұлы мұраны қадірлеу, оны көздің қарашығындай сақтау, өз үлесіңді қосып, дамыту және кейінгі ұрпаққа аманат етіп, табыстау деген сөз. Барша қазақстандықтардың жұмысының түпкі мәні – осы!» – деген сөзін бейнелеу өнері саласында жүзеге асыру. Қылқалам шеберлерінің көр­кемдік, графикалық және сәндік-қол­данбалы жұмыстары қазіргі шығармашылық үрдістердің ықпа­лында көрініс тапқан. Туындылардың түрлі стильдік және жанрлық жа­ғынан орындалуы – Қазақстан суретшілері шығармашылығының ізденімпаздығын айқын көрсетеді. «Нұрлы Жол» бағдарламасына деген ең үздік қолдау жаңа экс­по­зи­ция­дағы ұлттық өнерді мә­дени сәйкестендіру барысында бей­неленеді. Көрмеге танымал қазақстандық суретшілер қатысуда. Көрме елорда қонақтары мен тұрғындарын өздерінің тамаша еңбектерімен бір ай бойы қуантатын болады. Раушан ТӘУІРХАНҚЫЗЫ, АСТАНА.