Солтүстік Кореяда министр қалғып кеткені үшін ату жазасына кесілді

АСТАНА. 13 мамыр. Ату жазасына кесілген Корея Халықтық Демократиялық Республикасының (КХДР) тағы бір шенеунігіне қатысты үкім жүзеге асты. Бұл туралы РИА «Новости» хабарлады. КХДР Халықтық қарулы күштер министрі Хен Ен Чхольге Отанын сатты деген айып тағылған. Себебі, ол әскери шара кезінде қалғып кетіп, мемлекет басшысы Ким Чен Ынның бұйрығын орындай алмаған. Нәтижесінде көпшіліктің алдында зениттік қарумен атып өлтірілді. Жапонияның Киодо агенттігі таратқан мәліметке сүйенсек, өлім жазасы 30 сәуірде болған. Хен Ен Чхоль бұл қызметке 2014 жылдың маусым айында тағайындалған. 2012 жылдың шілде айынан 2013 жылдың мамырына дейін Солтүстік Кореяның Бас штабын басқарды. Аталған қызметке КХДР көшбасшысы Ким Чен Ынның ең сенімді адамдарының бірі, вице-маршал Ли Ен Хо отставкаға кеткеннен кейін тағайындалған болатын. КХДР Қарулы күштерінің жетекшісін Бас қолбасшы Ким Чен Ын тікелей басшылық жасайтын мемлекеттік қорғаныс комитеті тағайындайды. Халықтық қарулы күштер министрлігі аталған комитетке бағынады. Еламан Қоңыр. Дерек, сурет: РИА «Новости».