Қызылордада үш жасар баланы іздестіру жалғасып жатыр

ҚЫЗЫЛОРДА. 13 тамыз. Қызылорда облысында полицейлер жоғалып кеткен бүлдіршінді іздестіру жұмыстарын жалғастыруда. Бұл туралы egemen.kz тілшісі хабарлады. 2015 жылдың 5 тамызы күні 3 жасар бүлдіршін екі ағасы мен әкесіне еріп, Жосалы кентінің шет жағында орналасқан Калинин елді мекеніне жантақ шабуға барады. Екі ұлы үйден айыр алып келуге кеткен уақытта әкесі 2012 жылы туған Алтайұлы Баубектен көз жазып қалады. Із-түссіз жоғалып кеткен бүлдіршінді табу мақсатында жедел-іздестіру жұмыстары жүргізіліп, аудандық ішкі істер бөлімінің полиция жасағы, Ұлттық ұлан №5547 әскери бөлімінің қызметкерлері, иісшіл қызметтік иттер, төтенше жағдайлар мекемесінің қызметкерлері мен техникалық құрал-жабдықтары жұмылдырылды. Іздестіру шараларына аудандық әкімшілік қызметкерлері, жергілікті аудан тұрғындары мен еріктілер тобы да қосылып, жоғалып кеткен жерінен оңтүстік жаққа қарай 3 шақырым, солтүстікке қарай 4 шақырым, батыс жақта орналасқан Калинин, шығыс бетте орналасқан Сарыөзек елді мекендері толық араланды. Алайда, іздестіру жұмыстары нәтиже бермей жатыр. Осыған сәйкес, полиция баланы көрген-білгендер болса, өзіне хабарласуды сұрайды. Үстінде болған киімдері қара түсті футболка, көк түсті шапка, қара түсті шорты, көк түсті сүйретпе аяқ киім көрінеді. Ержан Байтілес. Дерек, сурет: egemen.kz.