Ақтауда қызын көліктен құлатып алған жүргізуші табылды

АҚТАУ. 13 мамыр. Ақтауда баласын жол үстінде көліктен түсіріп алған жүргізуші табылды. Бұл туралы lada.kz хабарлады. Осыған дейін Ақтау қаласындағы орталық жолдардың бірінде жүріп бара жатқан көліктің есігі ашылып кетіп, кішкентай қыз баланың құлап түскені туралы бейнеролик жарияланған болатын. 3 мамыр күні кешкі сағат 20:00 шамасында орын алған оқыс оқиғадан соң іздестіру жұмыстарын жүргізген құқық қорғау орындарының қызметкерлері көлік жүргізушісін, яғни, құлаған қыздың әкесін тапты. Көлік солға қарай бұрылған сәтте, жолаушылар жағындағы артқы есік ашылып кетіп, қыздың қатты екпінмен құлап, жол бойында бірнеше рет домалағандығы олардың соңында келе жатқан көліктің бейнебақылау аппаратына түсіп қалған. Дереу тоқтап, қызын алып үлгерген ата-анасы оны жедел ауруханаға апарған. Сәтін салғанда, екі жасар қыз бала қатты зардап шекпеген, тек денесі жырылып, жеңіл жарақат алған. Оқиғаға орай көлік жүргізушісіне «Жолаушы тасымалындағы ережені сақтамағаны» үшін бабы бойынша әкімшілік хаттама толтырылып, ол әкімшілік жауапкершілікке тартылды. Гүлайым Шынтемірқызы. Дерек, сурет: lada.kz.