Дума Волгоградты Сталинград деп атаудан бас тартты

АСТАНА. 25 ақпан. Ресей Федерациясының мемлекеттік думасы Волгоград қаласына бұрынғы «Сталинград» деген тарихи атауын қайтып беруден бас тартты. Бұл туралы Lenta.ru хабарлады. Ұсынысты думадағы коммунистік партия фракциясы 12 ақпан күні берген болатын. Коммунистер сонымен бірге Мәскеу қаласындағы орталық алаңдардың немесе көшелердің бірін Иосиф Сталиннің атымен атап, генералисимустың ескерткішін орнату туралы да ұсыныс енгізген еді. «Атты ауыстыру тек қана Волгоград облыстық думасының құқығына жатады. Ал Мәскеудегі көше атын беру мен ескерткіш орнатуды Мәскеу билігінің құзырлы органдарында», - деп атап көрсетті мемлекеттік думаның федеративті құрылымдар және жергілікті өзін өзі басқару мәселелері жөніндегі комитеті төрағасының орынбасары Виктор Казаков. Бұдан бұрын мемлекеттік думаның профилді комиеті қаулы жобасын алып тастауды ұсынған болатын. Өткен жылы президент Владимир Путин Волгоградтың тарихи атын референдум жолымен қайтаруға болатынын жоққа шығармаған еді. Өйткені, Ресейдің екінші дүниежүзілік соғыстағы ардагерлерінің бірі оған осындай өтініш білдірген-тін. 2013 жылы Волгоград қалалық думасының депутаттары Ұлы Жеңістің салтанаты күндері «қаһарман-қала Сталинград» деген атауды қолдану туралы шешім қабылдады. Қаланың негізі 1859 жылы қаланғанда ол Царицын деп аталған. 1925 жылы ол Сталинградқа айналды. Себебі, атаман Петр Красновтың бөлімдері қалаға шабуыл жасағанда, оның қорғанысын Сталин басқарған екен. 1961 жылы жеке басқа табынумен күрес шеңберінде елді мекеннің атауы Волгоград болып өзгертілді. Мұрат Айтқожа.