Шығыс Қазақстан облысында аудан әкімі тағайындалды

ӨСКЕМЕН. 13 мамыр. Шығыс Қазақстан облысының әкімі Даниал Ахметовтің өкімімен Рамиль Нығметшанұлы Сағандықов Көкпекті ауданының әкімі болып тағайындалды. Бұл туралы egemen.kz тілшісі хабарлады. Жаңа басшыны аудан активіне облыс әкімінің орынбасары Жақсылық Омар таныстырды. Рамиль Сағандықов 1967 жылы туған. Көкпекті ауданының Көкпекті ауылының тумасы. 1991 жылы Семей зоотехникалық-мал дәрігерлік институтын, 2014 жылы Қазақ инновациялық гуманитарлық-заң университетін бітірген. Еңбек жолын Көкпекті ауданының Үлкенбөкен ауылының «Шегелек» совхозының №3 фермасында жұмысшы болып бастаған. Институтты бітіргеннен кейін 1991-1994 жылдары мал дәрігері, ферма меңгерушісі болды. 1995-1998 жылдары «Шегелек» АҚ-ында бас мал дәрігері, 1998-2000 жылдары аталған кәсіпорында директордың орынбасары, 2000-2010 жылдары «Шегелек LTD» ЖШС директоры болып еңбек етті. 2010 жылдан 2011 жылға дейін Көкпекті ауданының Үлкенбөкен ауылдық округінің әкімі, 2011 жылдың тамыз айынан бастап Көкпекті ауданы әкімінің орынбасары, соңғы бес айда аталған аудан әкімінің міндетін атқарушы болып қызмет етті. Думан Анаш, Дерек: egemen.kz Сурет: Шығыс Қазақстан облысы әкімінің баспасөз қызметі.