Солтүстік Қазақстанда көшелер қазақшаланды

ПЕТРОПАВЛ. 13 мамыр. Облыстық мәслихаттың ХХХV сессиясында депутаттар бірқатар көшелерді мемлекеттік тілде атау жөнінде шешім алды. Бұл туралы Солтүстік Қазақстан облыстық мәслихатының мамандары хабарлады. Бұдан былай Юбилейный көшесі Кеңес Одағының Батыры Жәлел Қизатов атындағы көше болып аталады.Әбу Досмұхамбетов қысқа көшесіне Кеңес Одағының Батыры Ысқақ Ыбыраевтың, «Солнечный» ықшамауданындағы жаңа көшеге белгілі мемлекет қайраткері Фазыл Кәрібжановтың есімдері берілді. Рига көшесінен А.Пушкин көшесіне дейінгі бөлігі бір кездері Петропавл қалалық партия комитетін басқарған қоғам қайраткері Тауфик  Мұхамедрахимовтың атын иеленді. Сессияда  Булаево қаласындағы № 4 орта мектепке айтыскер ақын Ерік Асқаровтың,  Шал ақын ауданындағы Приишимка орта мектебіне жазушы Зейнел-Ғаби Иманбаевтың, Тайынша ауданындағы Қарағаш орта мектебіне  белгілі ақын Жақан Сыздықовтың, Уәлиханов аудандық  мәдениет үйіне танымал қаламгер Сәкен Жүнісовтың, Жамбыл ауданындағы Благовещенка мектебіне академик-ғалым Марат Кенжеғожинның, Шаховское мектебіне Ұлы Отан соғысының ардагері  Мәжит Қасеновтың, Петропавл қаласындағы қызмет көрсету саласы колледжіне Кеңес Одағының Батыры  Ескендір Дәуітовтың есімдерін беру туралы ұсыныстар да бірауыздан қолдау тапты. Өмір Есқали. Дерек: Солтүстік Қазақстан облыстық мәслихаты. Сурет: voxpopuli.kz