Ақтауда бір сыныпта 15 ұлттың өкілі оқиды

АҚТАУ. 13 мамыр. Маңғыстау облысының орталығы – Ақтауда бір сыныпта 15 ұлттың өкілі білім алып жүр. Бұл туралы 24.kz телеарнасына сілтеме жасап, egemen.kz тілшісі хабарлады. Ақтаудағы Нәсіпқали Марабаев атындағы мектептің бірінші сыныбында қазақ, корей, армян, ингуш, татар, орыс сияқты 15 ұлттың өкілі білім алуда. Олар Қазақстан халқы ассамблеясы жылына орай апта сайын «Достық» сабағын өткізуді қолға алды. Әр оқушы өз ұлтының киімін киіп, ана тілінде өнер көрсетеді. Бірлік күніне орай өткен тәрбие сағатында 15 ұлттың әні шырқалды. Әзербайжан қызы Назиля өз тілінде достық туралы өлең оқыса, Асқар мен Абдуалим Ногаевтар лезгин биін биледі. Биыл өз ұлтының өнері мен салт-дәстүрін меңгерген көпұлтты сыныптың оқушылары келер жылдан бастап өзге халықтардың да мәдениетін зерттеуге кіріспек. Басқа тілде ән айтып, түрлі ұлттың тағамын әзірлеуді үйренуді жоспарлап отыр. Гүлайым Шынтемірқызы. Сурет, дерек: egemen.kz.